Shillong, K’lyngkot, 12: U Myntri ka tnad Pule Puthi ka Sorkar Jylla u Bah Lahkmen Rymbui u la bthah ïa ki ophisar ka tnad ban phah ktien ïa ka Pro-Vice Chancellor jong ka North Eastern Hill University (NEHU) khnang ban wad ïa ki lad ki lynti ban weng ïa ki jingeh kaba la ktah ïa ka skulbah NEHU namar ka jingbym don u Vice Chancellor u Prof P. Shukla uba la pep trei mynta la 422 sngi.
Kane ka jingbthah jong u Bah Rymbui ka long hadien ka jingïakynduh bad ki kynhun na ka skulbah NEHU, ba kynthup ïa ka NEHUTA, NEHUNSA, NEHUSU, bad ka KSU kiba la kyntu ïa u ban tuklar halor kane ka jingeh.
Kine ki kynhun ki la kyrpad ïa ka Pro-VC jong ka NEHU Tura Campus ka Prof. Famelin K. Marak ba kan shimti ïa ka kam kum ka Acting Vice Chancellor lane kan risaiñ noh khnang ban ailad ïa u Senior Most Professor ka skulbah ban shim ïa ka jingkitkhlieh ha ka skulbah.
“Nga la (bthah) ïa ki ophisar jong nga ban pynbeit ïa ka jingïakynduh bad ka Pro-VC jong ka Tura ban peit kaei ka jingmut jong ka khnang ba ka jingthmu ba kongsan jong ka Sorkar ka long ba ka prokram, ka bha ka miat jong ki samla pule kam dei ban shah ktah satia ha NEHU namar lada ka ktah ïa ki ha NEHU kan ktah ïa ka jylla baroh kawei namarba bun ki kolej ki ïasoh bad wat ka baibam jong ki samla pule jong ka NEHU ruh kan shah ktah,” la ong u Rymbui ha ka jingïakren bad ki lad pathai khubor.
Haba pynpaw ïa ka jingsngewkhia halor ki jingeh bad ka jingbym beit ka rukom pynïaid ha skulbah NEHU, u Myntri u la ong, “ka jinglong jingman ha NEHU ka la kylla long kaba la ring swai. Ka long kaba eh bha wat ban pynbna ïa ki result, ban siew ïa ka bainong, ban ai jingmynjur na ka bynta ban pynlong ïa ki seminar bapher bapher bad kaba kham kongsan na ka bynta ban pynbna ïa ki result bad kiwei kiwei ki prokram jong ka NEHU.”
U Myntri u la banjur ba ka jingthmu ba kongsan jong ka Sorkar ka long ban pynthikna ba ka NEHU kan treikam beit khlem da ktah ïa ka bha ka miat jong ki samla pule.
U Bah Rymbui u la thoh sha u Myntri ka Sorkar Pdeng ha ka 15 tarik, Nohprah da kaba kyntu ban pynbeit noh shi junom ïa ki jingeh.
“Ngan pyrshang biang ban don ka jingïalang bad u khnang ban dup lah ban poi sha ka jingpynbeit kaba neh khnang ba ka jingtreikam jong ka NEHU kaba dei ka jaka pule ba pawnam ha India, kan long kaba ïaid beit ïaid ryntih,” u la bynrap
U Myntri u la banjur ïa ka jingdonkam ban pynbeit kyrkieh ïa kane ka jingeh, da kaba kdew ïa ka jingshah ktah ki samla pule bad ki kolej kiba pynïasoh bad ka skulbah NEHU.
“Ngim lah ban peit ïa ka jingeh ba ki shah,” ong u Bah Rymbui da kaba pynkynmaw biang ba u la bthah ïa ki heh Sorkar ban ïakren bad ka Pro-VC ban pynbeit shipor, ban pynthikna ba kan ym don ka jingpynthut ïa ka pule puthi.
“Ki aiñ jong ka NEHU kim donbor ban thung ïa u Acting VC… ka nongmihkhmat ba mynta ka dei ban risaiñ, kumba leh u Prof. Umdor, khnang ba u Professor ba kham rangbah un shimti ïa ka kam,” u la bynrap.
U la ong shuh shuh, ‘ka jingpynslem ka ktah ym tang ïa ki samla pule jong ka skulbah NEHU hynrei wat ïa kito kiba don ha ki kolej ba pynïasoh bad ka NEHU, ka ktah ïa ki jingpynbna ïa ki result bad kiwei kiwei.”
Haba kylli halor ka jinglong jingman jong ka jingtohkit ba la bthah da ka Ministry, u Bah Rymbui u la ong ba ka kaiphod tohkit jong ka tnad kaba la khlieh da u Prof D.P Singh kam pat pynpaw pyrthei.
“Ka Tnad ka la shimkhia bha, dei na kata ka daw ba ki la thung ïa ka jingtohkit… hynrei haduh kine ki sngi, ngim pat tip kaei kaba don ha kata ka kaiphod,” u la ong.
U Myntri u la pyntip ruh ba u Myntri Rangbah ka jylla u Conrad K Sangma u la ïakren bad ka Sorkar Pdeng ban wad ïa ki lad ki lynti ban pynkut ïa ki jingeh.
