Shillong, Jylliew, 30: Ka Sorkar Jylla ka la pynmih ïa ka jingpynbna kaba ailad ïa ki Kolej Sorkar ha ka jylla ba kin pynphong noh da ki Uniform khnang ban wanrah ïa ka jingïaryngkat kyrdan hapdeng ki samla pule kiba wan na ki longiing kiba ïapher ha ka ïoh ka kot.
Ïa kane la pyntip ha ka jingpynbna ba la pynmih da ka Meghalaya Education Department vide No.EDN.112/2019/221 kaba ha ka 24 tarik Jylliew 2025 lyngba u Commissioner and Secretary ka tnat Pule Puthi u Vijay Kumar Mantri.
Ka jingpynbna ka la pyntip, “ha kaba ïadei bad ka jingkyrpad na ki kolej sorkar bad na ki Students Union, ka tnat Pule Puthi ka la pynbna ba baroh ki Kolej Sorkar kin pynmih noh da ki Uniform bad manla kawei pa kawei ka kolej ki lah ban phah suh pynwandur hi katkum ka jingibit jong ki.”
Shuh shuh ka jingpynbna ka la ong ruh ba kane ka rai ka long ban wanrah ïa ka jingïatylli, ka jingïasngew paralok bad ka jingïalong kawei khnang ban weng ïa ki jingbym sngew ïaryngkat kyrdan hapdeng ki samla pule kiba wan na ki longïing kiba ïapher ha ka ïoh ka kot.
