Imphal, Jylliew, 22: Ka Sorkar Manipur ha ka sngi Thohdieng ka la pynmih da ka hukum ba baroh ki nonghikai Kolej ki dei ban aiti bad ban pynshisha ïa ki syrnot M.Phil./Ph.D. ba la ai na ka Chandra Mohan Jha (CMJ) University, Meghalaya ba la shah khang bad na kiwei kiwei ki jaka pule.
Ka jingpynshisha kan kynthup ïa ka jingïasyllok bad ka University Grants Commission (UGC), ka tnat Pule Puthi jong ka Sorkar Meghalaya, bad kiwei kiwei ki skulbah kiba don hapoh ka ri India khnang ban pynshisha ïa ka jingshong aiñ jong ki Degree.
Ha ka Office Memorandum, ka Joint Secretary (Higher & Technical Education) Laishram Dolie Devi, ka la pynmih ïa ka jingbthah sha baroh ki nonghikai skul sorkar bad ki skul ba ïoh jingkyrshan na ka sorkar kiba la ïoh ïa ki Degree ha ka M.Phil./Ph.D. kiba dei khamtam eh na ka CMJ University, ba ki hap ban phah ïa ki syrnot jong ki ban pynshisha lyngba ki Principal sha ka Directorate of Higher & Technical Education shwa ka 10 tarik, Naitung, 2025.
Kane ka jingbthah long katkum ka jingbud ryntih ïa ka rai ba la pynmih da ka Iingbishar Supreme Court ha ka 31 tarik, Lber, 2014, kaba la phah khang noh ïa ka CMJ University halor ki jingbym ryntih bad la pynpaw ruh ïa ki jingsngewkhia ha kaba ïadei bad ka jinglong hok jong ki jingpynshisha jong ka ha ka jingpule.
Ban pynneh ïa ka jinglong ba janai ha ka jingpule bad ban tehlakam ïa ka jingpyndonkam ïa ki Degree thok ne kiba don jingkylli, ka memorandum ka treikam ruh ïa ki nonghikai kiba lah ban pyndonkam mynshuwa ïa kum kine ki Degree na ka bynta ka jingthep kam, ki jingkiew kyrdan hapoh ka Career Advancement Scheme (CAS), ka jingpynskhem kam bad ki jingpynkiew tulop.
Ka memorandum ka la maham ruh ba kito ki nonghikai ki bym kohnguh ïa ka jingbthah ha ka por ba la buh yn pyndam mardor ïa ki jingmyntoi kiba ïadei bad kane bad kum ïa kine ki nonghikai yn kheiñ ba kim don satia ïa ka kyrdan pule.
