Shillong, Jymmang, 01: Ka All Meghalaya Domestic Workers Union (AMDWU) ha ka sngi Palei ka la phah register ne pynrung kyrteng ïa baroh ki nongtrei ïing briew khnang ba ka seng kan dup lah ban ai jingïada haba ki nongtrei iing briew ki ngat ha kino kino ki jingshah thombor ne ki jingshah leh bym hok ha ki trai iing nongaikam.
Ha ka jingïakren bad ki lad pathai khubor ka Kong Rachel Mawthoh bad kiwei kiwei ki nongïalam jong ka Union ki la dawa ruh ïa ka Sorkar ban thaw noh la ka jong ka Welfare Board jong ki nongtrei iing briew.
Katkum jingïathuh jong ka Kong Mawthoh, kumba ka long mynta ki don haduh 2500 ngut ki nongtrei iing briew kiba la register hapoh ka Union.
Haba ai nuksa ïa ka jingjia ha Nagpur dang shen halor ka jingshah thombor jong kawei ka nongtrei iing ha ka trai iing ïa kaba la ai jingïarap da ka KSU, ka Kong Mawthoh ka la ong ba ka Union ka la kyntu ïa ki nongtrei ïing briew kiba leit trei shabar ka jylla ba kin register ïalade bad ka Union khnang ba kan dup lah ban ai jingïarap da ka jingïatreilang bad ki bor sorkar lada don kino kino ki jingshah thombor ha ki jaka ba ki trei.
