Shillong, Jylliew, 20: Ka North Eastern Hill University (NEHU) ka la sospon ïa u Senior Professor jong ka Zoology Nirmalendu Saha uba long ruh u Dean jong ka School of Life Sciences hadien ka jingshah kem jong u dang shen ha ka Central Bureau of Investigation (CBI) halor ka jingdonkti ban kner ïa ka pisa T.3.43 lak
Ha kaba ïadei bad ka case jong u Prof. N. Saha, katkum ki kyndon aiñ, la ñiew ba la shah sospon hadien ba u la shah set along ha ka CBI haduh 48 kynta. Hadien ba la ïoh ïa ka jingpyntip na ka CBI, ka skulbah ka la phah ïa ka shithi sospon sha u Prof. Saha,” la ong u PRO ka NEHU ha u kyrwoh ba la pynmih ha ka sngi Thohdieng.
Ha ka 11 tarik, Jylliew, ka CBI, Guwahati ka la kem ïa u Professor jong ka Zoology uba dei u Dean jong ka School of Life Sciences jong ka North Eastern Hill University, Shillong bad ïa uwei u riewshimet (trai jong kawei ka kompeni) na ka Guwahati, Assam ha ka por ba ki donkti ha ka bamsap kaba kot T. 3.43 lak ha Guwahati University Guest House, Guwahati.
Ka CBI ka la register case ha ka 11.06.2025 pyrshah ïa u Prof. Nirmalendu Saha, bad ïa u Pranjal Sharma uba sah ha Bishnu Rabha Path, Beltola, Guwahati, Assam halor ka jingïoh jingtip kaba bniah ba u trai jong ka kompeni u donkti bad u Professor jong ka Zoology bad kiwei pat ki bym lah ban tip kiba donkti ha ka kam bamsap ha kaba la kynnoh ba u Prof. Saha u la shim kabu ban aiti ïa ka jingsuplai tiar na ka bynta ban pynbiang ïa ki tiar pule saïan, ki tiar ba pyndonkam ha Laboratory bad kiwei kiwei bad ka jingpyllait ïa ki bill.
Ka CBI kaba la pynlong ïa ka jingpynap shrip ka la ïohkem markhmat. Ïa kine kiba la shah kem la tian bishar ha Kashari ha Guwahati.
Ka CBI ka la pynlong ruh ïa ka jingkhynra ha ki ar tylli ki jaka bad lap ïa ki kot ki sla ba donkam. Ka jingkhynra ka la bteng ruh wat sha kiwei kiwei ki jaka.
 | ReplyForwardAdd reaction |
