Shillong, Lber, 20: Ka Hynñiewtrep Youths Council (HYC) ka la dawa ïa ka Sorkar Meghalaya ban leh da kaba tyngeh halor ka jingduhei arngut ki heprit ïa ka jingim hadien ba ki la bam ïa ka jingbam ba la sah hapoh skul ha ka jylla Karnataka.
Kane ka jingjia kaba la poi haduh u pud ba ki khynnah skul kin poi sha hospital, ka la pynlong ïa ka HYC ban dawa ïa ka jingtohkit bad ban pynshitom ïa kiba donkti.
Ha ka shithi ba la phah sha u Myntri Rangbah ka Jylla Conrad K. Sangma, u President ka HYC Bah Roy Kupar Synrem u la ong ba ka sorkar ka dei ban thaw da ka Fact-Finding Team ban tohkit bniah katno ngut ki khynnah ba la ïalam da ki kynhun bapher bapher sha ki skul pule kiba don shabar ka jylla Meghalaya.
Ka Council ka la dawa ba dei ban lum jingtip bniah bha ïa kum kine ki kynhun, nalor ka thup bapura jong ki nongkitkam, ki briew na ka jylla kiba don bynta ban ïalam ïa ki khynnah sha ki skul, ka kyrteng bad ki jingtip ba pura jong ki khynnah ba la ïalam da kine ki kynhun, ka kyrteng bad ka jingtip ba pura jong ki skul ba la pule da kine ki khynnah ba la pynrung kyrteng, ki jingtip ba pura jong ki jaka/ki nongshong shnong ha kaba ki khynnah ki sah bad bad ban buddien ruh ban pynthikna ba ki khynnah na ka Jylla kiba la pynrung kyrteng ne ba la buh ban sah ha kine ki skul la ki long neem kiba shngaiñ.
Ka Council ka la kdew ruh ïa ka kaiphod tohkit ha u snem 2009 da ka nongthoh khubor Sanjana Chappali ha ka Tehelka ba la ai kyrteng, “A Strange and Bitter Crop” kaba sei madan ïa ka jinglong jingman jong ki khynnah ba la ïalam da ka Rashtriya Swayamsevak Sangh (RSS) bad ki kynhun kiba ïatreilang.
Ka HYC ka la ong ruh ba palat hajar ngut ki khynnah na Meghalaya kiba ïoh jingpule ei ha kylleng ka ri India lyngba ka RSS namarkata ka donkam ïa ka sorkar ban pynthikna ba ka shong ka sah jong ki kan long kaba shngaiñ.
Shuh shuh ka HYC ka la ong lada ki kmie ki kpa ne ki nongri nongsumar ne ki khynnah ki kwah ban wanphai noh sha la ing bad ba kim lah ban wan phai na ka daw ka jingkyrduh pisa, ka Sorkar ka dei ban shimkhia ban wan pynpoi suk ïa ki sha la iing.
