Shillong, Rymphang, 19: Ka Iingbishar Meghalaya High Court ka la hukum ïa ka Sorkar Jylla ban pynlong ïa ka jingtohkit halor ka jingkynnoh tih mawshun beaiñ ha rilum Jaiñtia da ka Amrit Cement Industries Limited.
Ïa kane ka hukum la pynmih da ka Division Bench ba kynthup ïa u Chief Justice IP Mukerji bad u Justice W Diengdoh hadien ba la shong bishar ïa ka PIL ba la ujor da u Ranjit Chandra Goswami.
“Ha kane ka khep shwa ban pynmih ïa kano kano hukum bakongsan, ngi kwah ban sngap ïa u nongshah mudui No.9 bad kiwei kiwei ki nongshah mudui ki bym shym la wan mih ba dei ban phah da kane ka hukum. Ïa mynta, ngi bthah ïa ka Jylla ban ñiew ïa ka jingujor kum ka jingujor, ban leh ïa ka jingtohkit kaba donkam bad ban ai ïa ka kaiphod ha kane ka Iingbishar ban buh sngi. Ka long kaba donkam ban ong ba katba dang pynlong ïa ka jingtohkit nalor u nongmudui bad ki nongshah mudui dei ban phah jingtip ruh ïa u nongshah mudui No.9 (Amrit Cement Industries Limited),” ong ka Bench.
Ka la bthah ruh ban ai jingshakri ïa ka Meghalaya State Pollution Board bad ïa ka North Eastern Development Finance Corporation Ltd. La bthah ruh ïa u nongujor ban ai ïa ka Affidavit ba bniah ha lane shwa ban buh biang ïa ka sngi shong bishar.
Ka hukum ka ong ba u nongmudui uba kam ba u dei u briew uba don ka mynsiem ïarap paidbah, u la kynnoh ba ka Amrit Cement Industries Limited ka la donkti ban tih mawshun beaiñ ha ka rilum Jaiñtia.
“Halor ka jingpan Right to Information Act da u SK Sharma, ha ka 2 tarik, Lber, 2022 ka Guwahati Regional Office jong ka Indian Bureau of Mines kaba hap hapoh ka Ministry of Mines ka Sorkar India, ka la thoh ïa ka shithi sha u nongpan RTI da kaba kdew ïa ka jingdon jong ki kompeni bad ka jingpynjlan ïa ka Mining Lease ba la ai sha ki ha rilum Jaiñtia, ha ka shithi bynrap ba la kdew ha ka shithi.
Katkum kane ka jubab, ka Amrit Cement Industries Limited kam don satia ïa ka laisen ban khlong mawshun, ka la pynpaw.
Shuh shuh ka hukum ka ong, “la kynnoh ba khlem kano kano ka laisen ki la khlong beaiñ ïa u mawshun na ka bynta ban pyndonkam ïa ki karkhana jong ki ban pynmih dewbilat. Ka jingtih marpohkhyndew ka hap hapoh ka Section 23C jong ka Mines and Minerals (Development and Regulation) Act (MMDR Act), 1957, ka Meghalaya Minor Mineral Concession Rules, 2016 bad ka Meghalaya Mineral (Prevention of Illegal mining, Transportation and Storage) Rules, 2022 ba la don lypa.
