Shillong, Naitung, 30: Ka Iingbishar Meghalaya High Court ka la bthah ïa u Advocate General bad ïa u Nongïasaid aiñ jong ka nongmudui ba kin leit jngoh ïa ki jaka ba marjan jong ka Shillong Peak Ropeway Cable Car Project ban bishar bniah ïa ka jinglah ban pynjyrngam biang ïa ka khlaw da kaba siew bai lutksan.
Kane ka jingbthah jong ka Iingbishar ka long hadien ba la shong bishar ïa ka Public Interest Litigation (PIL) ba la ujor da ka Kong Geraldine G Shabong halor ka jingkynnoh ba ka la don ka jingpom pathar ïa ki dieng ha ka thaiñ Lawsohtun, East Khasi Hills District.
Ka Sorkar Jylla ka la kam ba ïa kane ka jingpom ïa ki dieng la leh hadien ba la ïoh ïa ka jingbit na ka Sorkar Pdeng katkum ka aiñ bad ki kyndon ba ïadei.
U Nongïasaid aiñ jong ka nongmudui u la kynthoh ba ka Sorkar Jylla ka don ïa ka kamram ban pyntreikam ïa ka jingsiew bailutksan haba pynngat ïa ki dieng ha kano kano ka jaka hynrei hynrei ka jingmih na ka jingthung bujli ïa ki dieng ha Meghalaya ka long kaba duna tam ha ka ri.
La pyntip sha ka Iingbishar ba ka Sorkar Jylla ka la pynkhreh ban thung ïa ki tynrai dieng, hynrei ka jingeh kaba mih mynta ka long ha kaba ïadei bad ka jingdon jaka ha ka jaka ba la shah ktah.
“Da ka jingai jingmut jong ki Nongïasaid aiñ ba la tbit na ka bynta ki arliang mamla, ngi kyrpad ïa u Advocate General bad ïa u Mr. Paul ban buh ïa ka sngi kaba biang, ban leit jngoh ïa ka jaka bad ban ai ïa ka kaiphod kaba lyngkot ha kane ka Iingbishar ha kaba ïadei bad ka jinglah ban pynjyrngam biang ïa ka khlaw sawdon jong ka Ropeway Cable Car Project,” la ong ka Bench kaba kynthup ïa u Chief Justice IP Mukerji bad u Justice W Diengdoh ha ka hukum ba la pynmih ha ka sngi Balang.
“La bthah ïa ka Sorkar Jylla ban pynbeit nadong shadong ïa ka bai leit bai wan jong ki bad na ka bynta ka shong ka sah, ka jingbam sngi bad ka dihsha sngi ha kano kano ka iing sorkar lane ha ka iingbasa lane ha kano kano ka jaka ba hajan jong ka thaiñ,” la bynrap ka hukum.
La buh sngi ban shong bishar biang ïa kane ka PIL ha ka 14 tarik, Nailar, 2025.
