Shillong, Naitung, 17: U Myntri Khynnah jong ka Sorkar Pdeng uba khmih ïa ka tnat Co-operation u Krishan Pal Gurjar ha ka sngi Palei u la hiar jurip ïa ka jingshna ïa ka Multipurpose Mini Gravity Storage Dam kaba la shna itynnat bha ha ka shnong Wahkdait, Mawtawar Shillong kaba hap hapoh ka Mawlai C&RD Block.
Ka jingwan jurip jong une u Myntri Khynnah ka Sorkar Pdeng ïa kane ka Dam ka dei namarba la shna da ka jingbei pisa na ka skhim MGNREGS lyngba ka Mawtawar Area Employment Council kaba kynthup ïa ki 4 tylli ki Village Employment Council, kata, ka Lummawsing VEC, ka Mawtawar Pdengshnong VEC, ka Laitlum VEC bad ka Riattamdong VEC.
Ïa kane ka Wahkdait Multipurpose Mini Gravity Storage Dam la mang pisa lyngba ka MGNREGS kaba kot T. 90,57,800 lak.
Da ka jingshna ïa kane ka Dam lyngba ka jingtreilang hapdeng ka tnat Soil and Water Conservation, ka tnat PHE bad ka tnat Water Resources, la lah ban sam ïa ka umbam umdih kumba 40 lak litre sha ki 2541 hajar tylli ki longiing ha ka shnong Mawtawar baroh kawei lyngba ka skhim Jal Jeevan Mission.
Ïa u Myntri ka Sorkar Pdeng la synran lang u Project Director ka DRDA Bah PT Passah, ka BDO jong ka Mawlai C&RD Block ka Kong Dahun Lyngdoh, ki ophisar na ka tnat PHE, u Rangbah Shnong ka shnong Mawtawar u Bah Kornelius Kharkongor, u Secretary Shnong u Bah KS Nongdhar bad kiwei kiwei.
