Shillong, Nailar, 06: U Myntri Rangbah ka Jylla u Conrad K. Sangma ha ka sngi Balang u la bishar bniah halor ka jingpyntreikam ïa ka Meghalaya Health Insurance Scheme (MHIS) bad la bthah ruh ïa ka tnad ka Koit ka Khiah ba kan wad bniah kyrkieh ïa ki daw tynrai kiba ju ïai jia na ka por sha ka por halor ka jingpynslem ban siew bad ka jingkyntait ïa ki jingdawa bad ban shim ïa ki lad ki lynti ban pynbeit na ka bynta ban pynthikna ïa ka jingtreikam hok jong ka skhim.
Ha ka jingïalang pyrkhat kam la ïashim bynta lang da ka Myntri ka Koit ka Khiah ka Dr. Ampareen Lyngdoh bad ki heh ophisar ka tnat ka Koit ka Khiah.
Ha u kyrwoh ba la pynmih ha ka rynsan X, u Sangma u la ong, “la bishar bniah ïa ka jingpyntreikam ïa ka Meghalaya Health Insurance Scheme (MHIS) ryngkat bad ka Myntri ka tnat Koit ka Khiah ka Dr. @ampareenlyngdoh bad ki heh ophisar na ka tnad ka Koit ka Khiah. La bthah ïa ka tnat ban bishar kyrkieh ïa ki daw tynrai halor ka jingpynslem ban siew ïa ka pisa bad ka jingkyntait ïa ki jingdawa, bad ban shim ïa ki lad ki lynti ban pynbeit mardor ïa kane ka kam khnang ban pynthikna ba dei ban pyntreikam hok ïa kane ka skhim da ka lynti kaba khuid bad kaba shai khnang ba kan ai jingmyntoi kaba paka tam ïa uwei pa uwei u nongshong shnong jong ka jylla Meghalaya.”
Ka MHIS ka long shi bynta jong ka jingpyrshang jong ka sorkar jylla ban pynbha ïa ka jingai jingsumar bad ban ai jingkyrshan ha ka pisa tyngka ïa ki nongshong shnong jong ka jylla. Ka jingpyntreikam bapura ïa ka skhim ka long kaba kongsan bha ban pynthikna ba ki nongshong shnong kin ïoh ïa ka jingsumar kaba ki donkam khlem da mad ïa ki jingeh ha ka liang ka pisa ka tyngka.
