Shillong, Naitung, 07: U Superintendent of Police ka East Khasi Hills District u la phah tohkit ha u Sub Divisional Police Officer (SDPO) ka Pynursla hadien ba la ïoh pdiang ïa ka jingujor na ka kmie jong u samla Getwin Jyrwa, 19 snem ka rta halor ka jingkynnoh ba u la shah pynshitom beiñ ha thanat Pulit ka Sohra Police Station ha ka 3 tarik, Naitung, 2025.
Ha ka jingïakren bad ki lad pathai khubor ha ka Lah Sngi u Blei, u Superintendent of Police (City), ka East Khasi Hills Bah Herbert Pynïaid Kharkongor u la ïathuh ba u SP un sa lah ban leh eiei halor ka jingujor tad ynda la ïoh ïa ka kaiphod na u SDPO hapoh kaba kut mynta ka taiew.
Haba ïathuh ïa ka jingjia, u SP City u la ong ba ki Pulit ka Sohra ki la ïoh pdiang ïa ka jingujor na u Rangbah Shnong jong ka shnong Mawkisyiem, Sohra ha ka 1 tarik, Naitung, 2025 ba uwei u briew uba la tip kyrteng kum u Job Majaw u la shah kren da ki ktien khlemakor bad shah byrngem ha u Getwin Jyrwa uba dei hi na kajuh ka shnong.
“Ka Dorbar Shnong ka la khot hajir ha ka 28 tarik, Jylliew bad ha ka 1 tarik, Naitung 2025 hynrei um (Getwin Jyrwa) um shym leit mih satia. Ïa ka ejahar ki (Dorbar Shnong) ujor ha ka 1 tarik, Naiutng, 2025,” la ïathuh u SP (City).
U la ïathuh ba ki Pulit tang shu ïoh pdiang ïa ka ejahar ki la leit wad ïa u Getwin sha Mawkisyiem hynrei kim shym la lap satia ïa u.
“Dei ha ka 3 tarik, Naitung, ba ka kmie ka leit ïalam hi dalade ïa u sha thanat bad hadien katto katne por ka kmie ka la wan shimti noh ïa u khun,” u la ong.
