Shillong, ïaïong, 02: Ka Jaiñtia Students’ Union (JSU) ha ka sngi Balang ka la dawa ïa ka Sorkar Jylla ban buh ïa ka Meghalaya Public Services Commission (MPSC) Examination Centre ha rilum Jaiñtia.
Hadien ba ladep aiti ïa ka dorkhas ha u Symbud Myntri Rangbah ka Jylla Bah Sniawbhalang Dhar, u General Secretary jong ka JSU u samla Beikee Mukhim u la ong, “ngi kyntu jur ïa ka Sorkar bad ïa ka Meghalaya Public Service Commission ban buh ïa ka MPSC Examination Eentre ha Jaiñtia Hills khlem pynslem. Kane kan ïarap haduh katta katta ïa ki jingeh ba ki samla ki la mad, khamtam ïa kito kiba wan na ki longiing longsem ba kham duna ka ïoh ka kot bad khnang ban pynthikna ba baroh ki samla ki dei ban ïoh ïa ka lad ban thoh ïa ki eksamin thungkam ba la pynlong da ka MPSC.
U la ong ba ka jingbym don jong ka MPSC Examination Centre ha rilum Jaiñtia ka la buh jingeh haduh katta katta ïa ki samla na ka thaiñ.
Ki samla na ki shnong nongkyndong jong ka East bad ka West Jañntia Hills District ki hap ban leit shaduh Shillong tang na ka bynta ban thoh ïa ki eksamin ba ju pynlong daka MPSC, kane ka bam ïa ka por bad ka wanrah ruh ïa ka jinglut jingsep kaba bun, khamtam ha ki kynta ba bunkam, kaba lam pynban sha u pud ban slem, bad bun na ki samla kim lah ban poi sha ki jaka thoh eksamin ha ka por kaba biang. Kito kiba poi shlem kim ïohlad shuh ban rung. Dei namar kine ki daw kiba pyndukha mynsiem ïa ki samla bad ban duh ei ïa ki lad ki kabu.
U samla Mukhim u la ong ba bun na ki samla ha rilum Jaiñtia ki dei kiba wan na ki longïing kiba kham duna ka ïoh ka kot. Ki jingpynlut pynsep ki long naduh ka bai leit bai wan sha Shillong kynthup naduh ka bai kali, ka bai bam, ka bai sah miet bad kane ka buh jingeh khamtam haba duna ka ïoh ka kot. Nalor kata, sa ka jingduh ban thoh eksamin na ka daw ka jingdheng kali ha ka leit ka wan ka la nang buh jingeh shuh shuh.
U la ong shuh shuh watla ki samla thepkam ki la nang bun bha ha rilum Jaiñtia, ka jingbym don jong ka Examination Centre ka pynduh jingmyntoi haduh katta katta haba ïanujor ïa ki samla na kiwei pat ki district kiba kham suk ka leit ka wan ban poi sha ki jaka thoh eksamin.
U nongïalam ka JSU u la ïathuh ba ka Union la bun bun sien ka la pynsngew ïa kane ka mat sha u Myntri ka tnat Pule Puthi bad sha ki bor ba dei peit hynrei ym shym la don ba sngap satia ïa ka jingud jingnam jong ka seng.
“Watla ka ophis jong ka MPSC Cell ka don ha Jowai, hynrei kam treikam satia na ka daw ba kam don ïa ka Examination Centre. Ki samla ki dang hap ban leit beit sha Shillong, bad kane ka pynlong ïa ka ophis ban ym ai jingmyntoi eiei ïa ki samla,” u la bynrap.
Ha kajuh ka por, u samla Mukhim u la ong naduh ba la pynkha ïa ka jylla Meghalaya ha u snem 1972, ki paidbah ka rilum Jaiñtia ki la mad bun ki jingtynjuh khamtam ha ka pule ka puthi bad ka ïohkam ïohjam.
“Ka jingwanrah ïa ka Examination Centre ha ka thaiñ jong ngi kan pun jingkieng ïa kane ka jingduna bad kan pynthikna ba ki samla na rilum Jaiñtia kin ïoh ïa kajuh ka hok ban ïatynjuh ha madan. Ngi kyntu ïa ka Sorkar bad ïa ka MPSC ban shim kham kloi ïa ki lad ki lynti halor kane ka jingdawa khnang ban pynmyntoi ïa ki paidbah ka thaiñ,” u la ong shuh shuh.
