Shillong, Nailar 17: Ka Hynñiewtrep Integrated Territorial Organization (HITO) ka la aiti ïa ka dorkhas sha u Lat ka jylla u CH Vijayashankar, ha kaba ka la kyrpad ïa ka jingtuklar lem jong u ban pyntreikam ïa ki hok jong ki jaitbynriew Khasi bad Jaiñtia kumba la kdew hapoh ka Instrument of Accession (IOA) and Annexed Agreement (AA) ba la soi ha ka 17 tarik u Nailar, 1948.
Katkum ka jingong ka HITO, ka Instrument of Accession and Annexed Agreement ka la ithuh ïa ki kyrdan ba kyrpang bad ki hok jong ki Hima ki Khasi kaba la neh sah khlem da pynurlong wat hadien ba la dep soi mynta la palat 75 snem.
“Da kaba burom ngi kyrpad ïa ka jingtuklar kaba kyrkieh jong u bad ka sorkar Meghalaya. Ngi kyntu ïa ka jingshim khia ba shimet jong phi ban ïakren bad ka sorkar khnang ban ïoh ka jubab bad ban aiti pat ka kaiphod kaba pura sha ka Ministry of Home Affairs haba ïadei bad ka jingpyntreikam ïa ka National Solemn Commitment kumba la kdew hapoh katei ka jingïamynjur,” ong ka dorkhas na u president ka HITO u Bah Donbok Dkhar.
U la ïathuh ruh ba ka National Commission for Scheduled Tribes (NCST) ka la pynmih ïa ki jingbthah ha u snem 2012 bad 2014, kaba banjur ban bsuh lang ïa ki treaty agreement hapoh ka Riti Synshar ka ri India bad ka jingpynurlong ïa ki jingangnud ban pynthikna ïa ki hok jong ki jaitbynriew Khasi bad Jaiñtia.
“Ka 17 tarik u Nailar, 1948, ka dei ka sngi kaba kyrpang ha ka khana jong ngi, ha kaba u C Rajagopalachari, u Governor-General barim ka India, u la pdiang ïa ka Instrument of Accession bad ka Annexed Agreement, ha kaba kane ka la pynskhem ïa ka jinglong ba kyrpang jong ngi kum ki briew bad ka jingïada ïa ka jingithuh lyngba ki kolshor jong ngi,” ong u Bah Dkhar da kaba banjur ba ka jingpynslem ban pyntreikam ïa ki jingkular ba la buh hapoh ka jingmynjur kan ktah bha na ka bynta ka imlang sahlang, ka kolshor bad ka jingïeng ka aiñ jong ka jaitbynriew Khasi bad Jaiñtia,” u la bynrap.
