Shillong, Nailur, 04: Ka Jaiñtia Students’ Union (JSU) ha ka sngi Palei ka la aiti da ka dorkhas ha u Lat ka Jylla u C.H Vijayashankar da ka jingkyrpad ba un ïakren bad ka Sorkar Pdeng bad ka Sorkar Jylla ban pynbna ïa ka nongbah Jowai kum ka Summer Capital jong ka jylla, ban pyntreikam noh mardor ïa ka Inner Line Permit (ILP) bad ban khmih bniah biang ïa ka Instrument of Accession (IOA) kaba la ïasoi ha ka 17 tarik, Nailar, 1948.
“Ngi kyntu ban pynbna ïa ka Jowai kum ka nongbah jong ka Meghalaya ha ka por lyiur (Summer Capital) ban pynurlong ïa ki jingïakren halor ka Tura kum ka nongbah ha ka por Tlang (hapoh ka jingbishar bniah shwa u 2025 da ka All Party Committee). Kane kan kyntiew ïa ka rilum Jaiñtia, ka iingshong ki jaidbynriew Pnar, War, Bhoi bad ki Biate hapoh ka Bri u Hynñiewtrep khnang ban pynthikna ïa ka jingïoh mar ïaryngkat hapdeng ki riewlum,” ong ka JSU ha ka dorkhas.
Ka la ong ruh ba ka jingpynbna ïa ka Jowai kum ka Summer Capital kan kyntiew ïa ka jinglong mar ryngkat jong ki jaitbynriew, kan pynkiew ïa ka jingbei tyngka, bad kan kyntiew ïa ki kam jngohkai pyrthei ha ka thaiñ. Ki la kdew ruh ïa ka jinglong tynrai jong ka Jowai, ka jingtei ba la pynkhreh ha ka synshar ka khadar bad ki jingdonkam ha ka roi ka par kum ki daw ba kongsan kiba kyrshan ïa ka jingtyrwa.
Ka JSU ka la kyrpad ruh ïa u Lat ban tuklar na ka bynta ban pyntreikam ïa ka ILP ha ka jylla Meghalaya, kaba la sahteng hadien ba la mynjur da ka Iingdorbar Thawaiñ ka jylla ha u snem 2019.
Ki la kynthoh ba ka ILP kan pyrkhing ïa ka jingwan rung ki briew kiba nabar, kan ïada ïa ka khyndew ka shyiap bad ka kolshor jong ki jaitbynriew trai ri trai muluk ha rilum Jaiñtia.
Shuh shuh, ka JSU ka la kyntu ruh ba dei ban bishar bniah biang ïa ka Instrument of Accession (IoA) ban pynskhem ïa ki jingïada jong ka Sixth Schedule bad ban pynthikna ïa ka jingsynshar laitluid ki riewlum. Ki la kam ba ka IoA ka la kular ba ki jaitbynriew kin synshar laitluid halor ka khyndew bad ban pynneh ïa ka riti dustur, hynrei ïa ki jingkyntur la donkam ban pynskhem biang na ka bynta ka rilum Jaiñtia.
“Ka IoA ka la kular ïa ki riewlum ban synshar hi halor ka khyndew bad ka riti dustur, hynrei ki jingkyntur beaiñ ki donkam ban pynskhem biang na ka bynta ka rilum Jaiñtia. Watla ym shym la don u Syiem Jaiñtia uba la soi (namar ka jingwan pynïasoh da ki Phareng ha u snem 1835), hynrei ki Syiem ki pynshisha ban ïoh ïa ki jingïada hapoh ka IoA,” la ong ka Seng.
