Shillong, Nailar, 06:Ka jingïakhih ba khlem pud sngi jong ki nongtrei ka Samagra Shiksha (Non-Teaching Staff) kaba dang bteng haduh mynta ka la pynlong ïa ki nonghikai jong ki skul SSA kiba don hapoh ka jylla ban ym ïoh satia ïa ka tulop jong u bnai Naitung, 2024.
Halor kane ka jingbym ïoh ïa ka tulop, ki nongïalam jong ka Meghalaya SSA School Association (MSSASA) ba la lamkhmat da u President u Bah Aristotle Rymbai ki la leit ban ïakynduh ïa u State Project Director (SPD) jong ka Samagra Shiksha ha ka sngi Baar u Swapnil Tembe ban ïakren halor ka jingsahkut jong ka tulop hadien ba ka tnat Pule Puthi jong ka Sorkar Jylla ka ladep ban pyllait ïa ka tulop naduh ka 25 tarik Naitung, 2024.
U Bah Aristotle C. Rymbai ha ka jingïakren bad ki lad pathai khubor u la ong, “ngi la aiti ïa ka jingthoh ha u State Project Director bad ngi dawa ruh ba dei ban pyllait noh ïa ka tulop jong u bnai Naitung.”
“Hadien ba ka tnat Pule Puthi ka ladep pyllait ïa ka pisa, ynda ngi la leit buddien ïa ka tulop sha ki District halor ka jingpynslem ïa ka tulop ka dei na ka daw ka jingïakhih jong ki Non-Teaching Staff, u la ong bad bynrap, “ngi la pynsngew ha u State Project Director ba ngim don eiei ban pyrshah namarba ki don ka hok ban pynlong ïa ka jingïakhih katkum ka hok jong ka riti synshar ka ri bad ngi ruh ki nonghikai ngi don ka hok katkum ka Article 21 bad ka Article 300 (A) jong ka riti synshar ka ri India bad kim don hok ban bat ïa ka tulop namarba ma ngi ki nonghikai SSA ngi shaniah tylli tyllan beit tang ha ka tulop ba ngi ïoh bad ngim don shuh da kiwei pat ki lad kamai.”
“Kane ka jingïakhih jong ki da kaba set ïa ka tulop jong ngi ka ktah shikatdei eh ïa ngi ki nonghikai SSA. Ngi la dawa ïa u SPD ba u dei ban pyllait noh mardor ïa ka tulop jong ngi bad lada kane kam urlong, lada jia eiei ïa ki nonghikai, ki nongtrei SSA bad lada ka mih kano kano ka jingïakhih na ka liang jong ngi ki nonghikai SSA, ma ki, (nongtrei SSA) ki dei ban shim hi ïa ka jingkitkhlieh,” la ong shuh shuh u Bah Rymbai.
