Shillong, Ïaïong 01: Ka North-Eastern Hill University Students’ Union (NEHUSU) bad ka Khasi Students’ Union (KSU) NEHU Unit ki la kyrpad ïa ka jingtuklar jong ki Myntri ka sorkar jylla na ka bynta ban wengnoh mardor ïa u vice chancellor ka NEHU u Prof PS Shukla.
Ha ka dorkhas kaba ki la phah sha ka Myntri ka sorkar jylla ka kong Ampareen Lyngdoh bad sha u Bah AL Hek ha ka sngi baar ki la ong, “Ngi la phah ïa kane ka dorkhas ban kyrpad ïa ka jingtuklar ba mardor jong phi ban shim khia ïa ki jingtreikam hapoh ka skulbah North-Eastern Hill University (NEHU). Ngi kyrpad jur ïa ka jingkyrshan ban shim khia halor ka jingeh ki samla pule, ki nongtrei kaba haduh mynta ym pat lah ban pynbha,” pynpaw ki ar seng.
Ka dorkhas ka ong ruh ba kiba don ha NEHU ki la ïaibteng ban pynpaw ïa ka jingpyrshah pyrshah ïa u Prof Prabha Shankar Shukla halor ki jingpulom jong u ban pyndep hok ïa la ki kamram bad ki shah kynnoh ba um lah ban pynïaid bha ïa ki kam jong ka university. Ki la pyntip ruh ba dei halor kine ki jinglong jingman ba ka NEHUSU bad ka KSU NEHU Unit ki la dep ban pynlong ïa ka jingshah thngan ha ka 5 tarik u Naiwieng, 2024, bad la pynsangeh noh hadien ba la ïoh ka jingkular na ka Ministry ba kan shim kam halor kane ka jingeh, bad ha ka hukum kaba 14 tarik u Naiwieng, 2024, ka Ministry ka la thaw ïa ka Inquiry Committee ban tohkit halor kine ki jingshah kynnoh. La ong ba ka committee ka la wan jngoh ruh ïa ka NEHU, na ka liang ki seng ki la aiti ruh ïa ki kot ki sla bad ki sakhi satar ban kyrshan ïa kine ki jingkam.
Shuh shuh la ïathuh ruh ba katkum ka shithi jong u Chairman ka Inquiry Committee kaba 28 tarik u Naiwieng, 2024, na ka liang ka tnat sorkar ka la ai bor ban pynjlan haduh 15 sngi ban pyndep ïa kane ka jingtohkit bad ban aiti ruh ïa ka kaiphod katkum ka jingshem bad jinglap jong ka. Hynrei wat hapdeng ka jingwan jngoh jong ka committee haduh mynta kam pat shym don ka jingshim kam ha kaba ka la pynlong ïa ka university ba kan ïaibteng ban treikam hapdeng ki jingbym thikna.
“Kumta ngi buh ka jingshaniah hapoh ki jingïalam jong phi ban shim ki rai halor ki sienjam ban pynkutnoh ïa kane ka jingjia ha NEHU,” pynpaw ka seng ki samla pule da kaba bynrap, “Ngi kyrpad jur ïa ka jingkyrshan jong phi na ka bynta ka jingdonkam ban wengnoh mardor ïa u Prof. Shukla kum u Vice-Chancellor ka NEHU, ha ryngkatlang bad kiwei pat ki nongtrei ne ophisar ki bym lah ban trei bha ïa ka kam, nangta ka jingdonkam ban wanrah ka jingkhuid suba bad ka lawei ba phyrnai jong ka university. Ka jinglah ban tuklar jong phi ha ka por kaba dei kan ïarap ban pynbha ïa ka rukom treikam bad ka bha ka miat jong ka NEHU. Ngi kyrmen ba phin shim khia ïa kane ka kam bad ban ïeng lang bad ki samla pule ba kin ïoh ka jingbishar kaba hok bad ban wanrah ka jingkylla hapoh kane ka skulbah.”
