Shillong, Nailur, 03: Ka Meghalaya Indigenous Minority Scheduled Tribe Forum (MIMSTF) ka la phah tuklar ha u Chief Secretary ka Jylla u uba long ruh u State Vigilance Commissioner u Bah DP Wahlang halor ka jingdawa ba dang shen jong u Working President ka KHNAM u Bah Thomas Passah ba ka bhah jong ki Scheduled Tribe (ST) ha Meghalaya ka long tang na ka bynta ki jaidbynriew Khasi, Jaiñtia bad Garo.
“Ngi pynrem jur bad ngi shim ba ka long ka jingpynpait bad ka jingpynïapher ïa kiwei pat ki Scheduled Tribe ba la ithuh kum ki jaitbynriew Rabha, Hajong, Koch, Boro, Mann bad Karbi jong ka Jylla Meghalaya,” ong ka MIMSTF ha ka dorkhas ba la aiti ha u Bah Wahlang ha ka sngi Balang.
Haba kdew ïa ka jingpynrung kam ha ka tnat shipai BSF ha kane ka jylla, ka Forum ka la ong ba dei ban buh jingmut ba ka Constitution (Scheduled Tribes) Order, 1950, ka Constitution (Scheduled Tribes) (Union Territories) Order, 1951 [As amended by the scheduled Castes and Tribes Lists (Modification Order) 1956, ka Bombay Reorganisation Act, 1960, ka Punjab Reorganisation Act, 1966, ka Himachal Pradesh Act. 1970, ka North-Eastern Areas (Reorganisation) Act, 1971, ka Scheduled Castes and Scheduled Tribes Orders (Amendment) Act, 1976 bad ka Scheduled Castes and Scheduled Tribes Orders (Amendment) Act. 2002) ki la ithuh ïa ki jaidbynriew Rabha, Hajong, Koch, Boro, Mann bad Karbi ban kynthup hapoh ka thup jong ki Scheduled Tribe ryngkat bad ki lai tylli ki jaidbynriew riewlum bun paid ka Meghalaya bad ïa ka hok bad ka jinglong tynrai jong ki la ïada katkum ka aiñ.
“Kum kine ki jingkren jong u Working President ka seng saiñpyrthei jong ka Meghalaya ka long bym shym la kheiñ snep bad kaba pynsniew ïa ka jingïalong kawei bad ka jingsuk, ka jingïatylli hapdeng ki jaitbynriew bapher bapher jong ka Meghalaya,” la ong ka Forum.
“Kumta, ha kaba pynskhem ban ïada ïa ka burom bad ka hok jong ka jaitbynriew jong ngi, ngi ka “Meghalaya Indigenous Minority Scheduled tribes Forum (MIMSTF)” ngi kyrpad ïa ka burom jong phi ban pynphai kylla ïa ka jingkren ka bym pat ju jia mynno mynno ruh bad ban pynduh ïa ka hok bad ki kyndon ba la pruiddak da ka riti synshar jong ka ri,” la bynrap shuh shuh ka Forum.
