Shillong, Nailar 29: U MDC ka Laban-Mawprem constitueny u Bah Ricky Shullai, ha ka sngi Thohdieng ula dawa na u Chief Executive Member ka Khasi Hills Autonomous District Council (KHADC) u Bah Shemborlang Rynjah ban tuklar halor ka jingkynnoh ba ka sorkar jylla ka la phah pyntreikam ïa ki scheme ka 15th Finance Commission lyngba ka Shillong Municipal Board.
Une u MDC haba ïakren bad ki lad pathai khubor ula ong ba katkum ka Tender kaba la khot da ka SMB ha ka 28 tarik u Nailar 2025, ka la khot ïa ki kontraktor ban pyntrei ïa ki kam kiba hap hapoh u pud u sam jong ki constituency MDC kum ka Jaïaw-Mawprem, Mawkhar-Pynthorumkhrah, Laban-Mawprem bad Laitumkhrah-Malki, khlem da burom shuh ïa ka bor jong ka KHADC bad ban pyntlot ïa ka rukom treikam jong ki MDC. U la ong ba ki skhim kiba dei na ka bynta ki constituency jong ki MDC ïa kaba la pyntreikam naduh mynshwa da ka KHADC ha ryngkat ka jingïatreilang bad ki MDC.
U Bah Ricky ula pynpaw ba kane ka jingleh jong ka sorkar ka long kumba ïuhroit ïa ka bor jong ka KHADC, kaba la shah pynkup bor katkum ka Sixth Schedule jong ka riti synshar ka ri India.
Na ka liang jong u, u la pynpaw ïa ka jingsngewkhia ba kane ka jingleh ka long kaei kaei kaba buh ha ka jingma kaba khraw, da kaba ailad ïa ki skhim kiba dei na ka bynta ki paidbah jong ka district la pynkhamti noh ïa ka bor ha ka kynhun kaba na shabar khlem da kynthup lang ïa ka Council.
U la ong, “Kum u MDC uba la shah jied na ka 15 Laban Mawprem Constituency, nga pyrshah jur ïa kane ka rukom leh. Nga lah shimkhia ïa kane ka mat bad u Chief Executive Member (CEM) ka KHADC ban dawa ba u dei ban tuklar mardor bad ban pan jingpynshai na ka sorkar jylla.”
“Nga pynthikna ïa ki paidbah jong ka constituency ka jong nga bad ïa ki paidbah baroh ba ngan bteng ban ïada ïa ka bor bad ïa ka jinglong kongsan ka District Council ka jong ngi bad ban pynthikna ba ki skhin kiba dei na ka bynta ki briew ki jong ngi kim dei ban shah rah jubor noh ne shah pynkynriah noh shawei” ula bynrap.
