Shillong, Nailur, 30: Ki nongïalam jong ka Jaiñtia Students Union (JSU), ka Khasi Students Union (KJSU) bad ki samla ba ïakhun ïa ka post Auxilliary Nurse Midwife bad Staff Nurse ha ka Lah Sngi u Blei ki la leit ban pan jingpynshai na ka Myntri ka Koit Khiah ka Dr. Ampareem Lyngdoh halor ka jingmih jong ki kynrum kynram ha kaba ïadei bad ka jingpynbna jong ka tnat ka Koit ka Khiah ka Sorkar Jylla ïa ka results jong ka post Auxilliary Nurse Midwife bad Staff Nurse.
Ha ka jingïakren bad ki lad pathai khubor hadien ka jingïakynduh ïa ka Myntri, u samla Lurstep Nongrum u la ïathuh hadien ba ladep pynmih ïa ka result ha ka por 10:00 baje mynstep ha ka sngi Saitjaiñ jong ka taiew ba ladep la shem ba ka long kaba thurmur namarba ïa ka result la pynmih tang ïa ki Roll Number bad ha kane kajuh ka sngi la pynmih biang ïa ka result ba kynthup ïa ki Roll Number bad ki Marks.
“Tangba nalor ki Roll Number kiba la mih mynstep la pynmih shuh shuh sa 46 tylli ki Roll Number bad ki don ruh ki Roll Number ba la mih arsien. Dei na kane ka daw ka la pynsuba sniew ïa ngi,” ong u samla Lurstep Nongrum.
“Kaba pynshaïong ïa ngi, ka long ba balei kijuh ki Roll Number ki mih haduh ar sien. Ki Roll Number kiba mih arsien ki dei beit na ka Garo Category bad ha ka Sports Category. Ha ka Unreserved Category kim don satia ki Roll Number ki ban mih arsien lada ki dei ki ST ruh. Kane ka buh ïa ngi hapdeng ka jingartatien bad u dak jingkylli,” u la bynrap.
“Hynrei ki (ophisar ka tnat ka Koit ka Khiah) la pynshai ba ka jingpynmih arsien ïa ki Roll Number ka long namar ba ki dei na ka Garo Category bad na ka Sports Category,” la ïathuh u samla Lurstep Nongrum.
U la ïathuh ruh ba ki ophisar ka tnat ka Koit ka Khiah ki la pynshai ba ka jingpynmih ïa kine ki Roll Number kam pat dei satia ïa ka Result hynrei ka dang dei tang ka Physical Verification.
“Hadien ba ngi la ïatai bniah, ngi la dawa ba dei ban pynmih ïa ki Roll Number bad ki kyrteng jong kiba ïakhun ïa ka eksamin naduh u Roll Number 1 haduh u Roll Number 6000. Nalor kata, dei ban pynmih ruh ïa ki Marks jong ki nongthoh eksamin ruh” ula ong.
U la ïathuh ba ki ophisar ka tnat ka Koit ka Khiah ki la kular ban sa pynmih ïa ka thup kyrteng bad ban aipor ruh sa shiphew sngi ba ki nongïakhun eksamin kin dup lah ban ujor sha ka Grievances Cell bad ha kajuh ka por ruh ka KSU, JSU bad ki nongthoh eksamin ki la dawa ba dei ban pynsangeh shwa ïa ka Physical Verification jong ki nongthoh eksamin ba la mih u Roll Number.
“Lada ngi don ïa kino kino ki jingartatien ngi lah ban leit ujor ha ka Grievances Cell khnang ba kin ai ïa ka Booklet ba ngin dup ïoh ban pynshisha ïa ki. Hadien ka shiphew sngi, lada ki jingjor ki bun, ka Sorkar ka dei ban shim ïa ka rai halor kiba ujor,” la ong shuh shuh u samla Lurstep Nongrum.
U la ïathuh ruh ba kum ka kynhun ki samla thepkam ki pynpaw ruh ka jingpyrshah ïa ki nongthep kam kiba nabar ka jylla ban aplai ïa ka post Auxilliary Nurse Midwife bad Staff Nurse haba wat tang na ka jylla Meghalaya ruh ka Sorkar kam lah ban ai kam.
Haba kylli, u la ong, “ynda la kut ki shiphew sngi, yn sa ai shwa ïa ka Sorkar ban shim rai bad hadien kata ngi ruh ngin sa shim ïa ka rai.”
