Shillong, Nailar, 21: Ka tnad Electronics and Information Technology jong ka Sorkar India ka la bthah ia baroh ki synran Social Media kiba treikam ha India ba kin bud ia ka hukum ba la pynmih dang shen da ka Iingbishar Supreme Court ha ka 20 tarik, Nailar, 2024 ha kaba iadei bad ka Kinnori Ghosh @ Anr. versus Union of India & Ors- Ha kaba iadei bad ka: ka jingpynsaphriang ia ka kyrteng bad ki dur jong kaba la khlad ha ka jingjia ha ka RG Kar Medical college.
Ka Iingbishar Supreme Court of India lyngba ka hukum ka la bthah ba baroh ki jingbatai ia ka kyrteng jong ka lanot kaba la khladnoh, ryngkat ki dur bad ki video kiba pyni ia kaba la khlad, dei ban weng mardor na baroh ki rynsan Social Media bad na ki Electronic Media.
Kane ka hukum ka la wan hadien ki jingsngewkhia halor ka jingsaphriang jong ki jingtip kiba iadei bad kane ka jingjia.
Ka bynta jong ka hukum jong ka Iingshari ka ong kumne harum ha ka ktien phareng:
“This Court is constrained to issue an injunctive order since the social and electronic media have proceeded to publish the identity of the deceased and photographs of the dead body after the recovery of the body.
We accordingly direct that all references to the name of the deceased in the above incident, photographs and video clips shall forthwith be removed from all social media platforms and electronic media in compliance with this order.”
Namarba kane ka hukum ka tnad ka la ban jur halor ka jingkongsan ban bud ia ka jingbthah jong ka Iingshari ban iada ia ka burom jong ki briew kiba iadon bynta bad kumta ki rynsan social media ki hap ban treikam mardor ban pynthikna ia ka jingbud ia kane ka hukum.
Ka Tnad Electronics and IT ka kyntu ia baroh ki kompani Social Media ba kin pynthikna ba kine ki jingtip kim dei satia ban saphriang shuh. Ka jingbym bud ia ka hukum jong ka Supreme Court ka lah ban wanrah ia ka jingpynshitom ha ka aiñ bad kiwei kiwei ki jingpynshitom.
Baroh ki rynsan Social Media kin pyntip ruh sha ka tnad Electronics and Information Technology lyngba ka cyberlaw-legal@meity.gov.in shaphang ki sienjam ba ki la shim ban bud ia kane ka hukum jong ka Iingbishar Supreme Court.
