Shillong, K’lyngkot, 15: Hadien ka jingïoh jingshaniah na ki kmie ki kpa kiba ju phah skul ïa ki khun ki kti da ki Bos jong ka Sustainable Transport & Efficient Mobility Society (STEMS) ha kylleng ki skul kiba don ha jylli ka Sor Shillong, mynta u snem 2026 ka Society ka la thmu ban pynïar ïa ka jingshakri na ka bynta ban phah ïa kine ki bos ba kin ai jingshakri sa sha kiwei pat ki district jong ka jylla, kata, ha Jowai bad Tura bad lehse ha ki snem ki ban sa wan yn sa pyntreikam ruh wat sha khapsor bad ha ki Civil Sub-Division katkum ka jingdawa jong ka por.
Ka Chief Executive Officer (CEO) bad Secretary jong ka STEMS ka Kong Isawanda Laloo ka la ïathuh ba ka jingthmu jong ka Sorkar ka long ban pynduna ïa ka jingbun ki kali shimet kiba ju leit on bad leit shaw skul ïa ki khun khamtam sha ka thaiñ Laitumkhrah kaba long ka pdeng jong ka pule ka puthi ha sor Shillong.
Ka la ong ruh ruh ba ka la don jingpyrkhat jong ka Society ban pyntreikam noh da ki Bos kiba kham rit kiba tang 18 Seat khnang ba kin dup lah ban ai jingshakri sha ki shnong kiba kham rit ki surok namarba ka jingdawa ïa kine ki bos ruh ka jur bha.
Ïa mynta ka STEMS ka la pynïaid haduh 60 tylli ki Bos bad 33 tylli la pyntreikam ha kaba leit shaw bad leit on ïa ki 1960 ngut ki khynnah skul ha Sor Shillong.
Ka CEO jong ka STEMS ka la pynshlur ïa ki kmie ki kpa ba kin phah skul ïa ki khun da ki Bos namarba ka Society ka la pynbiang nadong shadong ïa ki nongsynran bad ka la pynthikna ruh ïa ka jingshngaiñ jong ki khynnah skul.
Ka Sustainable Transport & Efficient Mobility Society (STEMS) ka la pynpaw ba ka long kaba kloi ban ïatreilang bad ka Meghalaya Transports Corporation (MTC) na ka bynta ban ai jingshakri ïa ki khynnah skul kiba ju shaniah ha ki snem baladep ha ki School Bus ba ju pynïaid da ka MTC.
Ka Chief Executive Officer (CEO) bad Secretary jong ka STEMS ka Kong Isawanda Laloo ka la ong ba ka Society ka long kaba kloi ban ai jingshakri namarba kiba bun na ki khynnah skul kiba ka MTC ka ju ai jingshakri ki dei kiba pule ha ki skul ka Sorkar Pdeng kum ha Kendriya Vidyalaya Nehu bad ha Upper Shillong.
Kane ka jingtyrwa jong ka Society ka long hadien ba ka Meghalaya Transports Corporation ka la pynmih ïa ka jingpynbna ban sangeh noh ka jingai jingshakri ban leit on bad ban leit shaw ïa ki khynnah skul naduh ka 1 tarik, Ïaiong, 2026.
