Shillong, ïaïong, 24: Uwei u nongialam jong ka kynhun ki Gang uba la tip kyrteng kum u Rudra Rabha u la pynkut ia la ka jong ka jingim ha ka byndi ha Khanapara Police Station ha ka step sngi Thohdieng.
Ia u Rudra Rabha la pynngat hapoh ka Section 379/401/511/307/34 IPC pule lang bad ka Section 27 (2) jong ka Arms Act ha ka 24 tarik mynta u bnai.
Katkum u kyrwoh ba la phah da u Superintendent of Police jong ka Ribhoi u Jagpal Singh Dhanoa u la pyntip ba ki Pulit ki la rah ban tian bishar ia u Rudra ha Kashari ha ka 25 tarik mynta u bnai ha kaba ka Kashari ka la aibor ia ki Pulit ban set along san sngi kynthih na ka bynta ba kin ioh tohkit bniah pyrshah ia u.
Ha ka jingtohkit, u Rudra Rabha u la phla ha ki Pulit ba u la buhrieh ia kawei ka suloi shna hi ha kawei ka khlaw bad ialam ruh ia ki pulit ban leit shimti ia ki tiar siat sha ka jaka ba u la buhrieh.
U Superintendent of Police u la iathuh ba ia ki tiar siat la kurup da ki Pulit na kawei ka jaka khlaw ha ka shnong Ranibari ha ryngkat ka jingdon jong ki nongsakhi.
Shuh shuh u la iathuh ba hadien ba la pyndep ia ki jingtohkit ha ka jaka ba la ioh kurup ia ki tiar siat ia u Rudra la ialam biang sha Khanapara Police Station ha ka por 1.05 baje mynstep jong ka 26 tarik mynta u bnai bad la set ia u ha ka along jong ka Khanapara PS namarba ka Rani Jirang Border Out Post kam don satia ia ka along.
Hynrei ha ka 26 tarik Iaiong, ha ka por kumba 4:00 baje mynstep, u nongap pahara uba dang don ha ka kamram u la lap ia u Rudra Rabha ba u la phasi ia lade ha along jong ka Khanapara Police Station da kaba pyndonkam ban teh da ki jain ha ki nar jong ka along ia kiba u la tar na ka jain siang thiah, la iathuh shuh shuh u SP.
Ha kaba iadei bad kane, u Executive Magistrate ba la phah da ka ophis jong u Deputy Commissioner ka Ri Bhoi District u la shimti ban pynlong ia ka jingtohkit ha ryngkat ka jingsakhi lang jong u Medical Officer ha kaba la ring dur lyngba ka video bad shondur ruh ia ka jingjia hapoh kane ka along.
Shuh shuh u SP u la pyntip ba la register biang ia ka Case ha Nongpoh Police Station haph ka Section 304 (A) IPC bad ka jingtohkit ka dang iaid shakhmat.
