Shillong, Lber, 13: U Chief Conservator jong ka tnat Forest u N. Luikham uba dei ruh u ophisar Indian Forest Services (IFS) u la pynkut noh ia la ka jong ka jingim ha u tyllai phasi ha ka ingsah ka jong u kaba don hajan ka Lady Keane College, Shillong.
Katkum u kyrwoh ba la pyntip da u Superintendent of Police jong ka East Khasi Hills District u Rituraj Ravi u la ong ba u Luikham u la phasi ialade ha ka por 7:30 baje mynstep.
Tang shu ioh jingtip halor kane, ki Pulit ki la leit ban shimti noh ia ka met jong u bad ban pynkit sha Shillong Civil Hospital na ka bynta ban leh ia ka Post Mortem.U Luikham u dei uba la don kumba 50 snem ka rta bad u dei u ophisar IFS jong ka Batch 2003.
