Shillong, Jylliew 24: Ki MDC ka liang pyrshah ha ka sngi baar ki la mih jyndat noh napoh ka Ïingdorbar ka KHADC ha kane ka sngi ban pynpaw ïa ka jingpyrshah ha kaba ki la kynnoh ba ka jingwanrah ïa ka mang tyngka ka EC ka Voice of the People Party (VPP) ka long ka bym ïaid katkum ki riti dustur.
Kane ka la wan hadien ba u Chairman jong ka Council u Bah Strong Pillar Kharjana u la pynbna ïa ka jingshim bishar jong u ban shah ïa ka EC ban ïakren ïa ka mang tyngka kaba pura na ka bynta ka snem 2025-26.
Kane kan long ha ka sien kaba nyngkong ha ka khana pateng jong ka jylla ba ïa ka Ïing la hap ban pynsangeh ha shwa ba ka EC kan wanrah ïa ka mang tyngka kaba pura na ka bynta ka snem 2025-26 hadien ba na ka liang ki MDC ka liang ïatei ki la pynpaw ïa ka jingpyrshah da kaba ong ba kane ka dei kaba beaiñ”.
Katkum ka jingujor ki MDC liang pyrshah ka rule 111 ka la batai shai ba kino kino ki jingpynlut ba bynrap ne supplementary demand ne additional amount dei ban wanrah hakhmat ka ïing hadien ba la mynjur ïa ka mang tyngka.”
Ïa ka supplementary expenditure na ka bynta ka snem 2024-25 ka kynthup ruh ïa ka mang tyngka kaba kongsan kaba ïadei ruh bad ka jinglut ban siew ïa ki tulop ki nongtrei kiba la shah ktah ha ka jingshimrai ba dangshen jong kane ka EC ba mynta ban pynduhkam ïa ki nongtrei bad kumjuh ruh ban pynduh ïa ka jinglong nongtrei ba pura jong ki.
Hadien ka jingpynsangeh ïa ka ïing haduh arsien u Executive Member ba khmih ïa ka tnat Finance u Bah Seiborlang Warbah u la ïada ïa ka rai jong ka EC kaba kynthup ruh ïa ka jinglut kaba bynrap na ka mang tyngka kaba kongsan jong ka KHADC.
Halor kane na ka liang jong u EM, u la ong ba ka EC kam tip ïa kine ki kam thungkam hapoh KHADC kiba khlem la mang hapoh ka mang tyngka ha kane ka snem.
“Ha kaba ïadei bad ka vote of account ba la wanrah da ka EC la pynpaw ba khlem lap ïa ki jingdkoh ki kam hynrei ka dei pat tang ha ka committee ba la thaw da ka EC, la shem ba ïa kitei ki kam khlem da don ka jingmang. Kumta ka jingpynlut pisa kaba bynrap ka dei na ka bynta kane,” pynshai u EM.
Bym bun ïa kane ka jingjubab na u EM, u nongïalam ka liang ïatei u Bah Titosstarwell Chyne u la ong, “Kumno ngin pdiang ïa ka mang tyngka kaba beaiñ bad kaba khlem ki rukom treikam kiba biang kiba long katkum ki kyndon. Ki kyndon ki batai shai ba ka jingmang pisa kaba bynrap dei ban wanrah hadien ba la mynjur ïa ka budget.”
Hadien ka jingïatai nia kaba thnam bha na ka liang u Chairman u la ong ba ka EC ka la pynshai la sngew ba ïa kane ka budget dei ban shah ban wanrah bad ïakren hapoh ka ïing.
Kum ka dak ban pyrshah na ka liang ki MDC kiba don ha ka liang ïatei ki la mihnoh shabar jong ka Ïingdorbar da kaba pynpaw ba kim long kiba la khreh ban don bynta ha kane ka jingwanrah ïa ka mang tyngka.
Haba kren sha ki lad pathai khubor u Bah Chyne u la ong ba ka budget book kaba don ki sub heads kiba pher bapher kaba la tyrwa ka jingmang pisa ha ka snem 2025-26, ha ka Grant No 1 jong ka GAD, kaba phylla kadei ka sub head kaba ai kyrteng da ka “supplementary expenditure 2024-25” ka la paw, ha kaba kane ka ka pisa kadei kumba T.1.88 klur, kaba ïasynriem ha ka Grant No 6 kaba ïadei bad ki kam legislative, kaba dei ruh ka sub head ba la ai kyrteng da ka “supplementary expenditure 2024-25” ka la paw lang.
“Kaei kaba phylla ïa ka jingshisha ka long ba kumno ka jingpynlut kaba bynrap la pynpaw hangne. Nga la wanrah ïa ka point order da kaba ong ba ka rule 111 ka la kren shai ba kino kino ki jingpynlut ba bynrap ne ka additional amount dei ban wanrah hapoh ka ïing dorbar hadien ba la dep ban mynjur ïa ka mang tyngka,” bynrap u Bah Chyne da kaba ong ruh ba ka jingdawa ïa ka supplementary demand na ka bynta ka snem 2024-25 ka la kut naba ka la paw shai ba la dep ban pyndonkam.
U la ong ba ka EC ka dei ban shim ka jingkitkhlieh ha kaba ïadei bad ka mang pisa jong ka snem 2025-26.
Haba pynrem jur ïa ka VPP halor ki jingbym lah ban treikam jong ka, u Bah Chyne u la ong ba kane ka EC ba mynta hapoh ka jingïalam jong u chief executive member u Bah Shemborlang Rynjah kam long kaba lah ban synshar ïa ka KHADC.
“U Chairman hadien ba la sngap ïa ki jingïatai u la hap ban pynsangeh shwa shipor ïa ka Ïingdorbar bad kane kan dei ha ka sien kaba nyngkong ha ka khana pateng jong ka KHADC. Ka Rule 111 dalade ka la pynshai ba ka khang ïa ka EC ban wanrah ïa ka supplementary demand ha ka mang tyngka,” ong u Chairman.
Shuh shuh na ka liang u Bah Chyne u la ong ba kane ka supplementary demand ka ïadei ruh bad ka jingsiew ïa ki tulop jong kito ki nongtrei kiba la shah wengkam dangshen ha kaba kane ka kam ka dang sah mynta hapoh ka jingbishar ka Ïingkashari.
“Hynrei na ka liang ka court ka la pynpaw ba kane ka jingwengkam kam don ka jingïadei bad ka mang tyngka, hynrei ka shong ha ka jingstad jong ka EC kumno kan siew ïa ka tulop ha ka jaka ban wanrah ïa ka supplementary expenditure 2024-25 ha ka mang tyngka kaba donkam, kaba dei ruh ha ka mang tyngka ka snem 2025-26,” u la ong.
