Shillong, Nailar, 06: Ki dkhot jong ka Khasi Students’ Union (KSU), Umïam Circle, hapoh ka jingïalam jong u President u samla Bashem Kharnaior, ryngkat u Asst. Organising Secretary u samla Banshan Nongbsap bad kiwei ki nongïalam jong ka seng, ha ka por 6:00 baje mynstep ka sngi Balang ki lah ïoh jingtip ïa ka jingdon jong ki mynder kiba wan da kawei ka kali AS25 CC 4375 bad la suba ba la ïalam ïa kine ki mynder da u briew uba kam ïalade kum u Pulit.
Ha u kyrwoh ba la phah sha ki lad pathai khubor ryngkat bad ki dur ki dar kynthup bad ka Identity Card jong uba kam kum u Pulit, ka KSU ka la pyntip ba une u briew u la pyni ïa ka Police Identity Card kaba don ïa ka kyrteng Brill Rongpeit kaba la kam ba la pynmih da ka ophis jong u Commandant, 1st Battalion, Meghalaya Police,Mawiong, Shillong.
Ha ka jingtohkit, ka KSU ka la lap ba une u briew u la ïoh lum pisa haduh T. 1,000 na manla uwei na ki san ngut ki bar jylla kiba la shong ha ka kali kaba don ïa u number AS 25 CC 4375, bad la ong ba ka pisa kaba la lum ka dei kum ka bai rung sha ka jylla Meghalaya.
Hynrei ha ka por ba ka seng ka la dawa ban pyni ïa ki kot ki sla kiba pynshisha ïa ka jinglum pisa, u briew uba kam ïalade kum u Pulit lem bad ki san ngut ki bar jylla ki la phet krad khlem da ai jingpynshai eiei.
Ka jingphet noh kynsan jong une u briew bad ki bar jylla ka la pynsuba sniew ïa ki dkhot ka KSU.
Marmar ki dkhot ka KSU Umïam Circle ki la pyntip ruh sha ki nongïalam jong ka KSU Mawlai Circle ban ïatreilang bad ban buddien ïa une u briew uba kam ïalade kum u Pulit ban lum pisa beaiñ.
Ka KSU ka pynpaw ba kane ka jingjia ka long kaba pynbitar shikatdei eh khamtam ha kum kane ka por ba ka jingrung kyrthep jong ki briew nabar jylla sha ka jylla Meghalaya ka la nang kiew stet bad ka jingdon jong u briew uba kam ïalade kum u Pulit bad uba lum pisa na ki bar jylla ban ailad ïa ka jingwanrung jong ki ha ka jylla ka dei ka kam kaba die tad dor ïa ka hok bad ban kheiñ troiñ ïa ki trai jylla bad ka jingpyndonkam bakla ïa ka Uniform Pulit.
Ka KSU ka la dawa ruh ïa ka tnat Pulit jong ka jylla Meghalaya ban ai jingpynshai halor une u briew uba la tip kyrteng kum u Brill Rongpeit la u dei shisha neem u Pulit namar ka jingpyndonkam bakla ïa ka kyrdan ne ka kam jong u, ne la u dei tang u riewshimet uba kam ïalade kum u Pulit ban pynïaid ïa ki kam be-aiñ.
