Shillong, Jymmang 31: U General Secretary jong ka United Democratic Party (UDP) Dr. Jemino Mawthoh uba la long teng u MLA barim jong ka Nongthymmai Constituency u la rai ban mih noh na ka party da kaba pynpaw ba ka dei tang ka daw shimet bad ka daw bym lah ban kiar.
U Dr. Mawthoh u la phah ïa ka shithi iehnohkam jong u sha u President ka UDP u Bah Metbah Lyngdoh ha ka 20 tarik mynta u bnai da kaba pynpaw, “na ki daw ki bym lah ban kiar, nga phah ïa ka shithi iehnohkam kum u dkhot jong ka party bad nga la pyllait noh ïa ka kam ba nga bat kum u General Secretary naduh kane ka khyllipmat.”
“Nga sngewkmen ba nga la shakri ïa ka Party kum u nongmihkhmat, kum u Working President naduh u snem 2014 bad kum u General Secretary naduh u snem 2016 haduh mynta. Nga kwah ban pynpaw ïa ka jingsngewnguh kaba khraw na ka bynta ki lad ki lynti kiba ka party ka la bynshet ha nga ha kine ki snem ban shakri ïa ki paidbah jong ka Constituency jong nga bad ïa ka jylla. Nga sngewnguh ïa ka jingkyrshan jong ki nongïatreilang bad nga ha ka samoi treikam hapoh ka party,” u la bynrap.
U Dr. Mawthoh u la pynskhem da kaba ong, “kane ka dei ka rai shimet jong nga bad nga bat skhem ïa la ka jong ka nongrim halor kane ka kam.”
U la pyntip ruh ba u la phah ïa ka shithi iehnohkam kum u Honorary Adviser, Planning, Investment Promotion and Sustainable Development Department, ka Sorkar Meghalaya.
Haba pynthikna ïa kane ka khubor halor ka jingiehnohkam jong u, u nongïalam ka UDP Bah Titosstarwell Chyne uba long ruh u nongïalam ka Liang Pyrshah ha KHADC ula ong ba um don jingtip eiei halor kaei ka daw kaba pynlong ïa u Dr. Mawthoh ban shim kynsan kynsan ïa kane ka rai kaba tyngeh ban mih noh na ka party.
Haba kylli, u Bah Chyne u la kam ba kam don satia kano kano ka kynram kynram hapoh ka party.
Ha kajuh ka por, ki khubor hamsaïa ka la bna ruh ba u Dr. Mawthoh u lah ban leit pynïasoh noh sha kiwei pat ki party.
