Shillong, Jylliew, 27: U Working President jong ka UDP u Bah Paul Lyngdoh uba long ruh u Myntri ka Sorkar Jylla ha ka sngi Thohdieng u la wohnia ïa ka Executive Committee (EC) ba la ïalam da ka Voice of the People’s Party (VPP) ha Khasi Hills Autonomous District Council (KHADC) kaba kam ba ka dang duna ha ka jingshemphang.
“Ym don mano mano ba lah ban kam ba ki duna ka jingshemphang bad ong ba ki dang shu tes ïa ka um,” la ong u Bah Paul.
“La jied ïa phi, phim lah shuh ban kam ba phi dang shu sdang ïaid, ban nang ïa ki buit, kata kam long kaba lah ban pdiang. Phi la rung ha ka kam ha kaba la khmih lynti ba phin ïalam, la khmih lynti ba phin tip ïa ki kyndon, ki aiñ, ki kam bapher bapher jong ka Council,” u la ong.
Kane ka jingkren jong u ka long hadien shisngi ba ka EC kaba ïalam da ka Voice of the People’s Party (VPP) ha KHADC ka la kam ba ka la mad shibun ki jingshah tynjuh namar ka jingbym pat don ïa ka jingshemphang lyngba u EM in-charge jong ka tnat Finance u Bah Seiborlang Warncis ha ka jingkren jong u ha ka Dorbar Lyiur jong ka Council ba dang shu kut ha ka sngi Palei.
U Bah Paul u la banjur ba ka dei ka kamram jong baroh ki MDC ba la shah jied ban pule la kumno kumno ïa ka Sixth Schedule, ïa ki aiñ bapher bapher, ki aiñ, bad ki kyndon. U la pynpaw ïa ka jinglyngngoh ba ki jingjia ki barit ki la poi sha ka Iingbishar, ha kaba ka iingbishar ka la buh jingkylli ïa ka jingpyntreikam ïa ki hukum ki bym don ïa ka aiñ.
U Myntri u la kdew ïa ar tylli ki mat kiba dang shen kiba la poi sha ka miej jong ka Iingbishar, kynthup ïa ka jingpynkut noh ïa ki katto katne ki nongtrei bad ka jingbuh ïa ka khyrdop lum khajna ha ka surokbah. “Shisien ba phi la don ïa ka surok ba hap siew khajna, ka paw shai ba ka surok ba la shna bad bei tyngka da ka NHAI kan ïoh biang ïa ka jingpynlut pisa jong ka da kaba don ïa ka khyrdop lum khajna. Mynta kano ka bor ha ka pyrthei ka ban ailad ïa kawei pat ka tnad ban lum khajna na ka surok ïa kaba ka ladep ban bei pisa bad kaba nga ngeit ba kam pat lah ban pynmih lut ïa ka pisa ba ladep ban bei. Kine ki dei ki mat, kam da donkam eh shibun ka jingshemphang, ka dei tang ka jingpyndonkam ka bor pyrkhat jong ka jabieng,” u la pynpaw.
Haba kylli hato ka EC kaba mynta ka dei neem ban pynwai noh namar ka jingbym lah ban treikam, u Bah Paul u la ong, “lada phi kren ïa ka jingbym don jingshemphang, u President ka VPP u la don ha ka Iingdorbar Thawaiñ ka jylla, u la long u President ka HSPDP, u la long u nongïalam ba hakhmat eh jong ka UDP, te kumno phin kren ïa ka jingbym don jingshemphang.”
U Bah Paul u la banjur ba ki nongjied ki deihok ban ïoh ïa ka jingmihkhmat kaba kham bha, bad ka long ka jingibeiñ ban jied da ki briew na “dhaba bad narud surok” bad leit bret ïa ki ha ka Council. “Ki (VPP EC) ki dei ban don katto katne ka jingshemphang ha ka kam shakri paidbah. Phin ym shim ïa ki nongbylla na dhaba bad narud surok bad leit bret ïa ki ha ka Council. Ka long ka jingpynjah burom ïa ki nongjied,” u la bynrap.
Haba ïadei bad ka jingpynïaid ïa ka jingthep vote shwa ban wanrah ïa ka mang tyngka ha KHADC, u Bah Paul u la kyntait ban kren eiei da kaba ong ba kan long kaba pynjah burom ïa kum kane ka jingleh.
U la ban jur ba ki kam jong ka VPP ki long kiba “bym don jingmut satia” bad u la ai jingmut ba ki dei ban pule lypa ïa ka kot aiñ jong ka Council.
