Shillong, Nailur, 05: Khatar ngut ki samla shynrang kiba la im kyrni ha ka jingdih ïa u drok ba la shah kem ha ki dkhot ka Hynniewtrep Integrated Territorial Organisation, (HITO) South West Khasi Hills ki la phla ba ki ïoh ïa u drok na Shillong, East Khasi Hills District bad na Nongstoin, West Khasi Hills District.
Ïa kine ki khynnah la ïoh bat da ki dkhot ka seng ha ka jingïakthong ha iew Mawkyrwat ha ka janmiet sngi Thohdieng hapoh ka jingïalam jong u Working President ka seng u Bah Bitnam Nongsiej.
Ïa u drok ba la thep ha ki tyndong plastik, ki thyrnia injekshon bad u Ganja ba la ïoh kurup na kine ki 12 ngut ka seng ka la pynjulor da kaba thang noh da ka ding.
“U drok u pynshitom ym tang ïa ki nongdih hynrei u pynshitom ïa ki bor pynïaid shnong, ïa ka iing ka sem, ïa ki kmie ki kpa kiba kha kiba pun,”ong u Bah Bitnam Nongsiej haba kren sha ki lad pathai khubor.
“Haba kim ïoh bylla shuh ki (khynnah dih drok) sdang sa ban khyllie ïa ki dukan ha iew ha hat, ki plie wat ïa ki iing briew. Na kata ka daw, ka seng ka phah ïa u kyrwoh uba shai bha bad ngi kyrpad jur ïa ki nongïalam shnong kiba hap hapoh ka South West Khasi Hills District, ba kin buddien bad ban trei shitom. Ngi la ïoh jingtip ruh ba ym tang na ka shnong Mawkyrwat hynrei wat na ki shnong ba marjan ki don ki khynnah kiba pyndonkam ïa u drok,” ong u Working President ka seng.
