Shillong, Jymmang, 23: Ki dkhot jong ka Jaiñtia National Council (JNC), Khliehriat Circle ha ka sngi Thohdieng ki la ïoh bat ïa ki arngut ki khynnah samla kiba im kyrni ban dih drok na kawei na ki jaka hapoh ka thaiñ Khliehriat.
Hapoh ka jingïalam jong u Working President Bah Diamon Bareh bad u General Secretary Bah Symboh Baïar Sumer ïa ki arngut ki nongdih drok la ïalam sha ka ïng treikam jong ka seng ha Khliehriat ban sneng ban kraw bad ai ryngkat ki jingkyntu kynpham ba u drok u long u nongshun ha ka imlang ka sahlang.
La kyntu ïa kine ki arngut ban ïaid ha ka lynti kaba bha khnang ban lait na ka jingshah teh mraw ha u drok.
Ïa u drok ba la ïoh kurup ïa ki arngut ki khynnah samla ka seng ka la pynjulor da kaba thang noh ha ka ding bad hadien kane ka seng ka la pyntip noh sha ki kmie ki kpa jong ki ban wan shimti noh ïa ki arngut ki khun.
Shuh shuh ka seng ka la pyntip ha ka jingïakren bad ki ar ngut ki la ïathuh ba ki don bunbah ki nongdie drok hapoh u pud u sam jong ka East Jaiñtia Hills District.
“Ka JNC–Khliehriat Circle ka la pynpaw ïa ka jingsngewkhia kaba jur halor ka jingïohrung laitlan ki nongkhaii drok hapoh ka thaiñ bad la kyntu jur ruh ïa ki tnad sorkar kiba peit ïa kane ka kam ba kin leh ïa kaba donkam tam,” ong u Working President ka JNC–Khliehriat Circle Bah Bareh.
Ka seng ka la kut jingmut ban ïakhun pyrshah ïa ki nongdie drok haduh ban da ïohkem bad ban aiti sha ki bor jong ka aiñ.
“Kane ka dei tang ka jingsdang bad ngin ym shong kli kti tad haduh ba ngin pynpra lut ïa ka kynhun ki nongdie drok ha East Jaiñtia Hills,” u la ong.
Ka seng ka kyrpad ruh ïa ki paidbah ba kin long kiba husiar bad ban ai jingtip ruh lada don kino kino ki jingjia kiba kum kine khnang ban shngaiñ ka shnong ka thaw bad ban suk ka imlang sahlang.
One attachment • Scanned by Gmail
 | ReplyForwardAdd reaction |
