Shillong, K’lyngkot 10 : Ka Learning Links Foundation kaba dei seng trei mon sngewbha kaba trei na ka bynta ban kyntiew ia ka jingpynsaphriang ia ka jingnang jingtip, da ka jingkyrshan jong ka Intel Technology India Pvt. Ltd ha ryngkat ka jingiatreilang bad ka Directorate of School Education and Literacy (DoSEL), SSA-SEMAM jong ka sorkar Meghalaya ka la plie paidbah ia ka Holistic Child Development Program kum shi bynta jong ka jingsdang ia ka “Adopt a School” Program.
Ka jingthmu jong kane ka prokram ka long ban shut ia ka jabieng jong ki khynnah khnang ba kin long kiba sted ban bat ia ki jinghikai bad ki jingnang jingtip ba la batai ia ki. Ia kane ka prokram yn pyntreikam ha ki 10 tylli ki skul kiba hap hapoh ka Mawlai C&RD Block ha East Khasi Hills District bad ki khynnah ki ban ioh jingmyntoi na kane ka prokram kin don shi hajar ngut kata naduh klas I haduh V.
Lyngba ka Holistic Child Development Program la khmih lynti ban ai jinghikai ia ki khynnah ha kiba bun rukom kum ka jinghikai ba kin sumar ia ka koit ka khiah lajong, ka jinghikai ba kin kilan met lane ba kin don ka jingsngewtynnad ha ki jingialehkai sports nalor kiwei pat. Katto katne na ki mat kiba hap hapoh ka Holistic Child Development Program ki kynthup ia ka :
- Learning Enhancement: Hangne kin pyndonkam ia ki rukom ai jinghikai ban nang pynkhlain shuh shuh ha ka jingpule jong ki khynnah bad ban pynrung ia ka mynsiem ba kin don jingsngewtynnad ban wad jingtip ia bun kiei kiei.
- Health and Wellness: Hangne kin peit thuh man ka sngi ia ka koit ka khiah jong ki khynnah, ka jinglah jong ki ban bam khnang ban pyntikna ba ki dei ban don ia ka met kaba khlain.
- Structured Sports curriculum through Khelo India: Yn pynshlur ia ki khynnah ba kin ia shim bynta ha ki jingialehkai Sports khnang ba kin ioh ia ka met kaba shait ba khlain , ba kin sngewthuh ia ka jingdonkam jong ka jingia tylli ha ka kynhun kaba ki don bad ba kin sngewthuh ruh ia ka kamram kum ki nongialam.
- Art Education: Yn pynshlur ia ki khynnah ba kin pyni ia ki sap kyrpang ba ki don , ba kin pyni ia ka jingiar ka jingmut jingpyrkhat jong ki khamtam ba kin tip ia ka jinglong tynrai.
Ka Learning Links Foundation ka sngew sarong ban ioh ia treilang bad ka Directorate of School Education and Literacy (DoSEL), SSA-SEMAM jong ka sorkar Meghalaya na ka bynta ban pynurlong ia kane ka jingthmu bad ban pyniar ia ki jingtreikam jong ka sha kiwei pat ki District ha ka jylla.
I Dr. Anjlee Prakash , Chairperson jong ka Learning Links Foundation I la pynpaw ka jingsngewkmen halor ka jinglah ban plie ia kane ka prokram bad haba pynpaw ia ka jingsngewkmen jong i, I la ong kumne “Ngi ngeit ba manla uwei pa uwei ne kawei pa kawei ka khynnah ki don ia ka hok ban ioh jingmyntoi na kane, kane ka dei ka jingthmu ba ym tangba ki khynnah kin ioh ia ka jingpule kaba thoh ha ka kot pule jong ki hynrei kin ioh ruh ia ka met kaba koit ba khiah bad ban ioh jingtip ruh shaphang ka jingriewspah ka jinglong tynrai jong ngi bad bun kiei kiei . Da ka jingiatreilang bad ka Directorate of School Education & Literacy (DoSEL), SSA-SEMAM jong ka sorkar Meghalaya, ngin nang pynkhlain shuh shuh ia ka jingangnud jong ngi ban wanrah jingkylla ha ka jingim jong ki khynnah”
KHYNDIAT SHAPHANG KA LEARNING LINKS FOUNDATION (LLF):
Ka Learning Links Foundation ka dei ka seng trei mon sngewbha kaba aiti lut na ka bynta ban pynriewspah ia ka jingnang jingtip bad ban ialam lynti sha ka lawei kaba phyrnai. Naduh ba la seng ia ka ha u snem 2002, ka la lah ban pyniar ia ki thapniang treikam jong ka ha baroh kawei ka Ri India bad ha Asia Pacific ruh kumjuh. Ka Learning Links Foundation ka ai jinghikai ia ki khynnah ym tang na ki kot pule jong ki hynrei ka saindur ia ka jingim jong ki khynnah da kaba ai ia ki ia kiwei pat ki jingtip ki bym shym la thoh ne batai ha ki kot pule jong ki. Na bynta ki jingtip ba kham bniah shaphang ka Learning Links Foundation, phi lah ban peit ha kane ka Website [Website: https://www.learninglinksindia.org].
