Shillong, Jymmang, 14: Ka Federation of Khasi Jaiñtia and Garo People (FKJGP) South West Khasi Hills District Unit ka la plie biang ïa u tala ba la khang ïa ka Sub-Centre ha ka shnong Umjarain, South West Khasi Hills District ha ka sngi Balang hadien ba ophis jong u District Medical and Health Officer (DM&HO) South West Khasi Hills District ka la kular ban thungkam pura ïa ka Kong Shidalin Lyngkhoi kaba dei ka trai jaka.
Ka jingkhang tala jong ka FKJGP ïa ka Sub Centre ha ka shnong Umjarain ka long halor ka nongrim ba ka ophis jong u DMHO kam shym la thungkam pura ïa ka kong Shidalin Lyngkoi kaba dei ka trai jaka hynrei la shu thung ïa ka tang kum ka Officiate ban trei ha kane ka Sub centre wat hadien ba ka la don ka jingmynjur ban thungkam iwei na ka longñing.
Ha ka jingïakren ba la khot da u DM&HO,. la donlang u Joint Director of Health Services, Shillong lem bad ki trai jaka ha kaba la ïakren sngewthuh bad kular ba yn thungkam pura noh ïa ka kong Shidalin Lyngkoi kumba la ïakut naduh ba sdang.
