Shillong, Risaw 07: Ka Employees’ State Insurance Corporation (ESIC) ka la plie paidbah ïa artylli ki sienjam ba kongsan – ka Scheme for Promoting Registration of Employers and Employees (SPREE 2025) bad ka Amnesty Scheme 2025 – ha ka prokram ba la pynlong ha Shillong Club mynta ka sngi. Ki artylli ki sienjam ki thmu ban pynkhlaiñ ïa ka rukom treikam na ka bynta ka imlang sahlang kaba shngaiñ ha ka thaiñ shatei lammihngi bad ban kyntiew ïa ka jingsuk ïa ki nongai kam ba kin bud ïa ki kyndon bad ai ki jingmyntoi ïa ki nongtrei ha ki kam bapher bapher.
Ka SPREE 2025, kaba treikam naduh ka 1 tarik Naitung haduh ka 31 tarik Nohprah 2025, ka plie lad shisien ïa ki nongpyntreikam bad ki nongtrei ki bym pat pynrung kyrteng hapoh ka ESI khlem da don ka jingdaiñ kuna ne ki jingsiew na ka bynta ki por ba la leit. Ka pynsuk ïa ka jingpynrung kyrteng lyngba ki rynsan online, ka pynshlur ïa ka jingbud ryntih da ka mon sngewbha bad ka thmu ban pynïar ïa ka jingïada ha ka imlang sahlang bad ka lad ïoh jingsumar na ka bynta ki nongtrei jong ka Meghalaya.
Ka Amnesty Scheme 2025, kaba treikam naduh ka 1 tarik u Risaw 2025 haduh ka 30 tarik u Nailur 2026, ka ailad ïa ki nongpynïaid kam bad ki briew kiba la ïoh insurance ïa ka lad ban pynbeit ïa ki jingïakynad kiba dang sahteng bad ban pynbeit ïa ki jingsiew bym pat siew haduh ka 31 tarik u Lber 2025. Ka thmu ban pynduna ïa ki jingshah mudui, ban kyntiew ïa ka jingshaniah bad ban pynthikna ïa ka jingbud ryntih da kaba ailad ïa ki jingpynbeit shabar ka ïingbishar bad ban pyllait ïa ki jingdaiñ kuna ynda la siew ïa ka jingsiew ba dei ban ai.
Ban ïoh ïa ka Amnesty Scheme, ki nongaplai kiba dei hok ki dei ban pynpoi ïa ka phorm ESIC ba la buh, ban ai ïa ki jingtip ba donkam bad ban siew ïa ki jingsiew kiba dang sahteng ryngkat bad ka sut. Hadien ba la mynjur da u Regional Director lane ka komiti ba la jied, yn ñiew ïa ki jingïakajia kum kaba la pynbeit, kaba ïarap ïa ki nongpyntreikam bad ki briew kiba la ïoh insurance ban pynbeit ïa ka jingbud ryntih jong ki katkum ka ESI Act.
Ïa ka Dependent Benefit Sanction Memo la ai sha ka Sengmek Marak, lok jong u Pinik A. Sangma (Bam kwai ha dwar u Blei), ha kaba la pynbiang ka bai bam tymmen kaba T 13,578 na ka bynta jong ka bad ki khun jong ka.
Haba ai jingkren ha kane ka sngi, u C. Songate, Principal Secretary ka tnad Labour, Sorkar Meghalaya u la ong, “Ka long kaba kongsan ban wanrah ïa baroh ki nongtrei kiba dei hok ban ïoh hapoh ka jingïada jong ka ESIC ban pynthikna ïa ka bha ka miat jong ki bad ka jingïada ha ka imlang sahlang. Ka Sorkar Jylla ka kyrshan pura ïa kane ka jingthmu bad ka la ai ka jingmynjur ha ka nongrim ban buh ïa ka ESIC Hospital kaba don 100 jingthiah ha nongbah Shillong.” U la pynskhem biang ba ka Sorkar kan pynïar ïa baroh ki jingïatreilang ha kaba pynïar ïa ki jingmyntoi jong ka ESIC sha man la ki district jong ka Jylla.
U Pranay Sinha, Insurance Commissioner, North-East and Eastern Zone bad u Robert L. Guite, Regional Director, ESIC North Eastern Region, ki la pynpaw ba ki sienjam kin pynkhlaiñ ïa ka jingbud ryntih, pynbeit ïa ki jingïakynad kiba la sahteng, pynduna ïa ki jingshah mudui bad pynïar ïa ka jingpynbiang ka jingshngaiñ ïa ka imlang sahlang na ka bynta ka jingmyntoi jong ki nongpyntreikam bad kumjuh ruh ki nongtrei.
