Shillong, ïaïong, 06: U Archbishop jong ka Jylla Niambah Shillong u Most Rev. Victor Lyngdoh ha ka sngi u Blei u la plie bad pynkhamti ïa ka Parish bathymmai ha Umtyrnga ha kaba la thung ïa u Rev. Fr. Sedish Marak kum u Parish Priest jong kane ka Parish.
Ka Parish Umtyrnga ka dei ka Parish kaba 45 ha ka Jylla Niam Bah Shillong kaba don ha Khappud Meghalaya bad Assam ïa kaba la saiñdur ha ka rukom kaba kyrpang namarba ki paidriewngeit ki dei ki la pynkhreh bha ban pdiang ïa ka jingwan jong ka Parish ïa kaba la sakhi da ki hajar ngut ki paid u Blei.
Ka Balang Umtyrnga baroh shikatta ka hap hapoh ka jingkhmih jong ha Parish Byrnihat kumba 26 snem.
Hapdeng ka jingphyrnai jong ka suiñ bneng ki Lyngdoh, ki Riewniam shynrang bad kynthei ki la ïoh bynta ïa ka Mass Bakhuid ba la pynbynta da Archbishop Victor Lyngdoh ryngkat ka jingdonlang jong u Auxiliary Bishop u Most Rev. Bernard Laloo kynthup ïa u Rev. Fr. Francis u Parish Priest ka Byrnihat Parish, u Regional Superior jong ka Guwahati Province’s jong ka Jingïasyllok Capuchin, u Rev. Fr. Renny VP, u Rev. Fr. Theophilus Massar uba dei u Assistant Parish Priest ka Umtyrnga.
Ïa ka Parish thymmai jong ka Umtyrnga la ainam ha ka kyrteng jong ka “Our Lady of Miracles.”
Haba plie ïa ka Parish thymmai u Archbishop u la aibor ha u Rev. Fr. Sedish Marak ban khlei jubanlak ïa ka jingphla jingngeit jong ki Apostle, ka jingkular ban shakri ïa ki paid u Blei, ka jingdoh ieid ïa ki saw tduh sawdong ka duwan, la ïalam sha ka khet jingphla bad ka jingai ïa u shabi jong ka Parish ha u nongsharai banyngkong.
Haba kut jong ka jingaiti ïa ka jingplie Parish u Archbishop Victor Lyngdoh u la ai ïa ka dulir ïa kaba la shon muhor da u Archbishop bad ka jingsoi ïa ki dulir.
Ka jingplie Parish ha Umtyrnga ka dei ka jingkylla jong ka por bad kaba don ka khanatang ha Jylla Niam Bah Shillong ha ka jingdon jong ki Parish Priest na ki Parish ba markhap kum ka Byrnihat, Umkadhor.
Ka Parish Umtyrnga ka hap ban khmih ïa ki 25 tylli ki shnong ba kynthup ïa ka Nagrabil, Behananodi, Lalmati, Jol Syiem, Khanapara, Pahamkancho, Nongspung-A, Nongspung B Mawiong, Nongspung-C, Timbogre, Tagongbari, Pillangkata -A, Pillangkata-B, Maikhuli, Nongthymmai Garo, Umdem, Umtyrnga bad Iongkhuli.
