Shillong, Jymmang, 21: U Myntri Rangbah ka Jylla Conrad K. Sangma ha ka sngi Balang u la plie paidbah ïa ka surok ba la ainam ha u Archbishop Hubert Rosario ba la khladnoh kaba don ha Spein, Mookaswan, West Jaintia Hills.
Kane ka surok kaba jrong kumba 1.13 kilomitar la tei ha ka jinglut kaba kot T. 1.93 klur, kaba poi sha ka Hubert Acupressure Centre ka shlem ai jingsumar ba la pynïaid da ka jingïasyllok riewniam Visitation Sister of Don Bosco (VSDB) ka Balang Catholic, Jowai Diocese.
U Sangma u la ong ba ka jingmut ba shisha jong kano kano ka kam pynroi ka shong ym ha ka dor hynrei ha kiba shah ktah ka jingim.
“Kane ka surok ka lah ban long kaba T. 1.93 klur ka projek ha ka mang tyngka, hynrei na ka bynta jong nga, ka la ai jingmyntoi haduh katta katta ïa kiba bun, khamtam ïa kiba pang ba shitom, kiba donkam ïa ka jingpynkhiah bad ïa ki Sister kiba ai jingsumar ïa kiba pang,” u la ong.
U la ïathuh ba ki jaka sumar ha ki shnong nongkyndong kum ka Hubert Acupressure Centre yn sa mang pisa ha ka bynta ba hadien ban ai jingïarap na ka bynta ban shna pynheh ïa ka jaka sumar.
U Myntri Rangbah u la ïathuh ba ka Sorkar ka la rai ban ai jingkyrshan ïa ki nongsumar dawai kynbat ha kylleng ka jylla khnang ban kyntiew shuh shuh ïa ka buit sumar dawai kynbat.
U Symbud Myntri Rangbah Bah Sniawbhalang Dhar, uba la ai jingkren ha kane ka sngi u la ïaroh ïa ki Sister kiba la phaikhmat ban ai jingsumar ïa ki briew kiba donkam ïa ka jingpynkhiah ha ka met ym tang ha ka mynsiem.
U la pynpaw ka jingsngew sarong ban ïohi ba ka shnong Mookaswan ka don ïa ki riewniam Sister kiba aiti ïalade ban shakri na ka bynta ki briew kiba donkam ïa ka jingsumar sumer ha ka pang ka shitom.
Ha ka jingplie ïa ka surok la sakhi lang da u Most Rev. Victor Lyngdoh uba long u Archbishop jong ka Shillong Archdiocese, u Bishop ka Jowai Diocese u Most Rev. Ferdinand Dkhar, u MLA ka MLA Bah Wailadmiki Shylla bad ki ophisar na ka tnat PWD.
