Shillong, Jymmang 28: U Myntri Rangbah ka jylla u Conrad K. Sangma ha ka sngi Balang u la plie ïa ki Block Development Integrated Complexe ba dang shu dep tei thymmai ha Songsak bad ha Dambo Rongjeng kaba ha East Garo Hills district.
Ha kane ka prokram plie la shim bynta lang da u Myntri ka tnat Community and Rural Development (C\&RD) u Abu Taheer Mondal, u Myntri ka Public Health Engineering (PHE) u Marcuise Marak, bad ki MLA ba kynthup ïa u Jim Sangma bad Rupert Momin.
Haba kren ha kane ka sngi, u Myntri Rangbah u Conrad K. Sangma u la pynpaw ïa ka jingangnud jong ka sorkar ban kyntiew naduh tynrai haba ïadei bad ki kam synshar khadar. “Hadien ba ka sorkar MDA ka la shimti ïa u lakam synshar ha u snem 2018, bun na ki C&RD block ki la treikam hapoh ki jinglong jingman kiba sniew dur bha. Bun na ki Block Development Officer (BDOs) kim don satia ki jaka ban treikam kiba biang ne ki ophis,” u la ong.
“Haba ithuh ïa ki kam ba ratbah jong ki ophis ha ki block-level ha ka ban pyntreikam ïa ki kam pynroi kiba la sdang, ngi la pyllait ïa kiba bun ki rukom treikam kiba pura ban kyntiew ïa ki jingtei jong baroh ki C&RD block. Ngi sdang shwa da ki 6 tylli ki block, bad mynta kane ka jingsdang ka la kiew sha baroh ki 56 tylli ki block ha kylleng ka Meghalaya,” u la bynrap.
U Myntri Rangbah u la pyntip ruh ba ka jingtei jong kine ki complex bathymmai la bei tyngka hapoh ka Special Assistance to States for Capital Investment (SASCI) scheme kaba dei ka jingmang kaba T 120 klur, kaba dei ruh na ka sorkar pdeng kaba la sdang ban kyntiew ïa ki jingtei na ka bynta ki kam pynroi ha ka jylla.
U la banjur ruh halor ki jingpyrshang kiba ïar jong ka sorkar ban pynbha ïa ki jingtei ha ki jaka bapher bapher. “Ka rukom treikam jong ngi ka pynleit jingmut ha ka ban pynkhlaiñ ïa ki jingtei ha ki thaiñ nongkyndong, ba kynthup ha ka koit ka khiah bad ka pule puthi ban wanrah ki lad pynroi ha jylla Meghalaya,” u la bynrap.
Haba shim kabu halor kane, u Myntri Rangbah u la kyntu ïa ki nongshong shnong ban pynrung kyrteng Aadhaar, da kaba pynpaw ïa ka jingdonkam na ka bynta ban pyntreikam ïa kiba bun ki skhim ka sorkar pdeng. “Ka Meghalaya ka dang ïaibteng ban long kawei na ki jylla kaba dang duna bha kiba pynrung kyrteng Aadhaar ha ka ri. Ban pynthikna ïa ka jingtreikam kaba khuid, ka jingkheiñ kaba biang ha ka ban pyntyllun ïa ki skhim ka sorkar, ka jingpynïasoh Aadhaar kadei mynta kaba kongsan. Ngi kyntu ïa ki nongshong shnong ban wan shakhmat bad ban pyndep ïa ka jingpynrung kyrteng,” u la ong.
La khmih lynti ba kine ki complex ba dang shu plie thymmai kin ai ka jingshakri kaba bha tam, kin pynbha ki jingïadei bad ki paidbah haba ïadei bad ki kam shakri kiba kongsan, bad kin ai ka jaka kaba biang ïa ki nongtrei sorkar.
