Shillong, Risaw, 01: U Myntri Khynnah ka Sorkar Pdeng ba dei khmih ïa ka tnad Skill Development and Entrepreneurship mynta ka sngi u la plié paidbah ïa 30 tylli ki Entrepreneurship Development Centre ha kylleng ka thaiñ shatei lammihngi ha ka “Northeast Skill Development and Entrepreneurship Conclave 2024” ha IIM Shillong.
Kane ka conclave ka la long ka dak jong ka jingsdang ïa kane ka sienjam ba heh ban seng 30 tylli ki Entrepreneurship Development Center (EDC) bad saw tylli ki Incubation Center (IC) ha kylleng ka thaiñ shatei lammihngi hapoh ka tnad Skill Development and Entrepreneurship. Kane ka projek ka thmu ban pynkupbor ïa ki samla da kaba kyntiew ïa ki sap seng kam lajong bad ka jingtei ïa ka jinglong jingman kaba ïahap lyngba kine ki 30 tylli ki EDC bad saw tylli ki IC. Ka kynthup lang ïa ki sienjam ba heh kum ka jingkyntiew ïa ki jingdon jingem, bad kiwei kiwei ki sienjam kum 90 tylli ki prokram ai jingtip shaphang ka jingseng kam lajong, 90 tylli ki prokram ban kyntiew ïa ka jingseng kam lajong, 40 tylli ki prokram ban pyntbit shuh shuh ïa ki nonghikai bad ki jingïakhun bapher bapher ban pynshlur ïa ka jingsaiñdur thymmai. Kine ki sienjam ki thmu ban don ka jingsdang 900 tylli ki startup ha kane ka thaiñ.
U Chaudhary, u la ban jur halor ka jingkongsan jong ka Entrepreneurship Conclave bad ki lad kiba don ha ka thaiñ shatei lammihngi bad u la ong, “Ki jylla ka thaiñ shatei lammihngi, ha kine ki 10 snem ba la dep, ka la mad ïa ka jingkhyllie im biang, bad ka la poi biang sha ka kyrdan kaba paw. Ka jingpeit bniah ka Sorkar ha ka polisi ‘Act Fast for North East and Act First for North East’ ka la plié lad ïa kane ka thaiñ ba kan paw kum ka bynta kaba heh ha ki kam bapher bapher. Lyngba ka jingkiew ki lad ka leit ka wan bad ka jingbun ki samla ba la nang la stad, baroh phra tylli ki jylla ki la sakhi ïa ka jingkiew shaphrang, kaba la don ka bynta kaba heh ha ka thong jong ka India ban poi sha ka ïoh ka kot kaba san trillion.
Kane ka prokram ka thmu ban kyntiew ïa ka jingseng kam lajong bad ka jingkyntiew ïa ki sap ha ka thaiñ shatei lammihngi jong ka India. Ka conclave ka la kynthup ïa ka jingpynshlur ïa ka jingïatreilang ha ka thaiñ da kaba pynïahap ïa ki sienjam ha ki jylla bad ki jingthmu ka Tnad ban don ka jinglong jingman kaba khlaiñ ha ka jingseng kam lajong bad ki sap. Ha kane ka prokram la wan ïashim bynta lang da u Nyato Dukam, Myntri ki tnad Commerce & Industries, Labour & Employment, Information, Public Relations & Printing, Sorkar Arunachal Pradesh, bad Jayanta Mallabaruah, Myntri ki tnad Public Health Engineering, Skill, Employment & Entrepreneurship and Tourism Departments, Sorkar Assam, Shakliar Warjri, Myntri ki tnad Sports and Youth Affairs and Labour Registrations and Stamps, Sorkar Meghalaya, Lalnghinglova Hmar, Myntri Khynnah ki tnad, Labour, Employment, Skill Development and Entrepreneurship, Sports and Youth Services, Excise and Narcotics Department, Sorkar Mizoram.
Ki jingïakren ki la long halor ki rukom ban pyndonkam ïa ki lad ki lynti kiba don ha ki samla jong ka thaiñ lyngba ka jingpyntbit bad ka jingseng kam lajong, da ka jingpeit bniah ïa ki jingpynbeit lyngba ki jingsaiñdur thymmai bad ka jingkiew ka thaiñ. Kane ka jingïatreilang ka thmu ban wanrah ïa ka jingkiew ka ïoh ka kot ha ka rukom kaba ïaineh ha ka thaiñ shatei lammihngi. Ki nongïalam na ki jylla ka thaiñ, ki riewshemphang ha ki kam, ki nonghikai ki la ïadon lang ha kane ka conclave, bad ki la ïakren shaphang ka jingpynkhlaiñ ïa ka thaiñ bad ka jingplie ïa ki lad ba thymmai.
KI Myntri ki la batai shaphang ki rukom treikam ba seisoh tam ha ki jylla jong ki bad ki la ban jur halor ka jingkongsan jong ka jingtei ïa ka jinglong jingman kaba khlaiñ ha ka jingkyntiew ïa ki sap kaba ïahap bad ka jinglong kaba kyrpang jong ka thaiñ ha kaba ïadei bad ka deiriti bad ka ïoh ka kot. Ki la ban jur halor ka jingdonkam ban kyntiew ïa ki ITI, ka jingbei tyngka bad ka jingpyntreikam ïa ka rukom jied ïa ki nonghikai kaba kham bniah khnang ban don ka jingai jingpyntbit kaba kham biang. Da kaba ithuh ïa ka jingshongdor jong ki mar ba shna da ki kti, ki la ong ba dei ban pyndonkam ïa ki jingnang jingstad jong kine ki nongshna tiar kum ki nongohshrong ïa ki dieng, ki nongshna tiar da ki siej, ki nongthaiñ carpet, ha ryngkat ka jingpynïahap ïa ki jingnang jingstad tynrai jong ki bad ki jingdonkam ha ki iew ha kane ka juk mynta.
“Nga ïoh mynseim shisha na kane ka jingïakren shai ba ngi la ïoh mynta ka sngi. Ka long kaba shai ba man ka jylla ka don la ka jong ka jingeh, hynrei kaba paw shai ka dei ka jingthrang bad ka jingkut jingmut jong baroh. Ka jingban jur u Myntri Rangbah Duh halor ka jingïatreilang ka Sorkar Pdeng bad ki Sorkar Jylla ka paw ha kane ka jingïatreilang jong ngi – ngi dang pyrkhat jngai da kawei ka jingthmu na ka bynta ka India ha u 2047,” u la ong.
U Jayant Chaudhary u la ong, “Kawei ka jingthmu ïa ka India ha u 2047, ngi dang pynkylla ïa ki rukom treikam jong ngi ban kyntiew ïa ki ITI, pdiang ïa ki jingïatreilang hapdeng ka Sorkar bad ki kynhun, ki riew shimet, bad sumar ïa ki lahduh ha ka pyrthei lyngba ka jingkyntiew ïa ki sap bad ka jingseng kam lajong. Da kaba pyndonkam ïa ki rynsan kum ka SIDH bad ka jingepit ïa kiwei kiwei ki lad kum ka jingïoh jinghikai ha ki jaka sah, ngi lah ban pynthikna ba ki samla jong ngi ki long kiba la pynkhreh na ka bynta ka lawei.”
Kane ka sienjam ka thmu ruh ban ai jinghikai ïa 600 ngut ki nonghikai bad pynthikna ki jingdon jingem ha ki jaka pule ba kham halor. La dep shim ïa ki sienjam ha kaba ki khliehduh jong ki centre ki la ïoh jingpyntbit ha ka Indian Institute of Entrepreneurship (IIE) bad la seng ruh ïa ki EDC. Ki prokram ban kyntiew ïa ka jingseng kam lajong kin ïarap ïa 900 ngut ki samla ba kin ïakhun ban ïoh rung ha ki incubation prokram, ha kaba 50 ngut na ki kin ïoh ïa ki bai sdang treikam kaba haduh T 5 lak. Ka projek ka pynthikna ruh ïa ka jingpynïasoh bad ki skhim Sorkar kiba ïahap ban kyrshan ïa ka jingkyntiew ïa baroh 900 tylli ki business plan.
U Maotoshi Longkumer, MLA bad Advisor, Labour & Employment, Skill Development & Entrepreneurship, & Excise Department, Sorkar Nagaland, Madan Cinturi, MLA bad Advisor jong ka Sorkar Sikkim, tnad Skill Development bad Shreeshail Malge, Joint Secretary, ka tnad Skill Development and Entrepreneurship, Sorkar India, ki la ïadon lang ha kane ka sngi. La wan ïashim bynta lang ruh da u Prof D.P. Goyal, Director ka IIM Shillong, kum u Symbud Kongsan.
Hapoh ka Skill India Mission, ka tnad ka la shim ïa ki sienjam ba heh ban kyntiew ïa ki sap ha kylleng ka ri da kaba peit bniah ïa ka thaiñ shatei lammihngi. Lyngba ka Pradhan Mantri Kaushal Vikas Yojana (PMKVY), palat 13.40 lak ngut ki briew ki la ïoh jinghikai naduh u 2015 ha kaba T 857.84 klur ka dei kaba la mang na ka bynta ki jylla ka thaiñ shatei lammihngi. Ka sienjam Jan Shikshan Sansthan (JSS) ka la ai jingpyntbit ïa 1.24 lak ngut ki briew naduh u 2018 ha kaba don T 37.26 klur na ka bynta ka thaiñ shatei lammihngi. Shuh shuh, 1,015 tylli ki jaka treikam ki la pdiang ïa 43,820 ngut ki apprentice hapoh ka skhim National Apprenticeship Promotion (NAP). Shuh shuh, 73,487 ngut ki briew ki dei kiba la pynrung kyrteng ha 110 tylli ki ITI ha kylleng ka thaiñ naduh u snem mang tyngka 2014-15, ha kaba 48,870 ngut ki Vishwakarma ki la ïoh jinghikai hapoh ka PM Vishwakarma.
Ban pynkhlaiñ ïa ka jinglong jingman jong ka jingpyntbit ha ka thaiñ shatei lammihngi, la pyllait T 43.13 klur, kaba kyrshan ïa ki sienjam ba kynthup ïa ka PM-JANMAN, PM Daksh, bad SFURTI, ha ryngkat ka skhim ba bei tyngka da ka Sorkar Pdeng ban kyntiew ïa ki ITI. Shuh shuh, ki jingdon jingem na ka bynta ki kam digital ïa ki paidbah ki dei kiba la saiñdur ban pynkylla ïa ki jinglong jingman jong ka jingpyntbit, ka jingïoh kam bad ka jingseng kam lajong kaba pynkupbor ïa ki samla ha kylleng ka thaiñ shati lammihngi ba kin don bynta ha ka jingkiew ka ïoh ka kot jong ka ri.
Ka Northeast Skill Development and Entrepreneurship Conclave 2024 ka dei ka dak jong ka juk kaba thymmai ha ka jingïaid lynti ka thaiñ sha ka jinglah pyndap ïalade bad ka jingkiew shaphrang. Lyngba ka jingpeit ïa ka jingpynkupbor ïa ki samla, kane ka conclave ka la pyni ïa ka jingkut jingmut ka Sorkar bad kito kiba don bynta ha ka kam ban wanrah ïa ka jinglong jingman kaba kyntiew ïa ka jingsaiñdur thymmai, ka jingseng kam lajong bad ka roi ka par kaba ïaineh ha ka thaiñ shatei lammihngi jong ka India.
