Shillong, Naiwieng, 21: U Myntri ka Sorkar Jylla uba khmih ïa ka tnat PHE bad kiwei kiwei u Marcuise N. Marak ha ka sngi Thohdieng u la kam ba ka don ka jingkylla kaba paw ha ki jingtei jong ka jylla Meghalaya bad ka jingkiew kaba 11 percent ha ka roi ka par hapoh ka jingïalam jong u Myntri Rangbah ka jylla u Conrad K Sangma.
Haba ai jingkren ha ka jingplie ïa ka ïew die doh bad dohkha ha Williamnagar ba dang shu dep shna thymmai bad ïa ka Extension Building jong ka Williamnagar Municipal Board (WMB), u Marak u la ong, “ka Meghalaya ka la ïohi ïa ka jingkylla kaba paw ha kaba ïadei bad ki jingtei hapoh ka jingïalam jong u Myntri Rangbah ka jylla, u Conrad K Sangma bad ka jylla ka la sakhi ïa ka jingkiew kaba 11 percent ha ka liang ka pisa tyngka.
U la ïaroh ïa u Chief Executive Officer u Ripamchi N Sangma bad ïa u Chairman jong ka Williamnagar Municipal Board u Benedick K Sangma kiba la don bynta ban pynurlong ïa ka jingtei ïa ka iew khnang ba ki nongdie kin ïoh ïa ka jaka die kaba khuid.
U la ïathuh ba ka Sorkar ka la thmu ban shna sa ïa ka iew die jhur ha Williamnagar ban ïarap ïa ki nongrep.
Haba kren shaphang ka jingkhuid jingsuba, u Marcuise u la bynrap, “da kaba pyrkhat ïa ka jingeh jong ki nongrep trai jylla ha kaba die ïa ki mar rep jong ki ha ki sngi iew, ka Sorkar ka la thmu ban tei ïa ka iew die jhur ha Williamnagar. Shen yn sa shna ïa ka jaka shohdoh ha Williamnagar bad ïa ka jaka ruh ladep ban ithuh.”
U la kyntu ïa ki nongdie doh bad nongdie dohkha ba kin ïatreilang ha kaba pynkhuid ïa ki jaboh jabaiñ.
U Deputy Commissioner u RP Marak u la banjur ïa ka jingdonkam jong ki jaka die ba la buh kyrpang, da kaba pynkynmaw ïa ki nongdie jingdie ba la khang pyrshah da ka Ïingbishar High Court ban die doh bad dohkha harud surok.
U la pynpaw ruh ba ka Williamnagar, kaba la don lypa ïa ka master plan, ka dei kaba la nang kiew shaphrang ha kiba bun ki liang.
Na ka liang jong u Superintendent of Police Bah Stephen Rynjah u la kyntu ïa ki nongdie jingdie ba kin leh khuid leh suba bad ban pynneh ïa ka jingshngaiñ hapoh iew bad ban jingïarap ruh na ki bor Pulit lada don kino kino kiba leh kam sniew hapoh iew.
