Shillong, Kyllalyngkot, 16: Bun tylli ki ïing kiba don hajan ka Parking Lot ha Ïew Mawlong markhap bad ka Anjalee Cinema ki la pluh ha ka sngi Thohdieng ha ka por kumba 4:30 baje janmiet.
La ïohi ba ka jingpluh jong ki ïing ka la long kaba ishyrkhei bha bad ka la don ruh ka jingbthei saw tylli ki LPG Cylinder Gas.
Tang shu ïoh jingtip halor kane ka jingjia, ki Pulit ka tnat Fire and Emergency Service (F&ES) ki la leit mar mar ban tem ïa ka jingklang jong ka ding bad kat haduh ba la thoh ïa kane ka khubor ym pat lah satia ban tip ïa ka daw tynrai jong ka jingpluh ding.
Katkum ka jingtip ba la ïohlum, kam shym la don kano kano ka jingjia ba sngewsih lane ka jingmynsaw jong ki briew hynrei ki jingdon jingem kiba don hapoh ki ïing kiba ïing, ïa kiba ym pat lah ban ïoh jingkheiñ, ki la julor lut ha ka jingklang jong ki thylliej ding.
Ka Sukun Thapa ha ka jingïakren bad u nonglum khubor ka Batesi TV ka la ïathuh ba ka ding ka la sdang na kawei ka ïing ka bym don briew namarba baroh shi ïing ki la leit shuti tlang sha shnong.
Ka la ïathuh ba ki don kumba 85 tylli ki longïing kiba sah ha Goenka Compound bad suba ba ka daw jong ka jingpluh ding ka lah ban dei na ka jingthut ka bording.
Kiba sah hangne kiba bun ki dei na ka jaitbynriew Nepali, Bihari bad kiwei pat ki jaidbynriew bad ïa kine ki lanot la pynkynriah noh na kane ka jaka sha Them Metor kaba don ha Them Ïewmawlong.
Namar ka jingklang jong ka ding, da ki phew tylli ki kali ka tnat Fire and Emergency Service (F&ES) na Nongthymmai, Mawlai, Upper Shillong, na Ïewduh kumjuh ruh ki kali pynlip ding jong ki shipai ki la wan poi ha kane ka jaka ban ai jingïarap khnang ban pynlip ïa ka ding kaba la nang klang kat haduh ka por 6 baje tam janmiet kaba la shimpor haduh ar kynta tam eiei ban pynlip ïa ka ding.
U MLA ka South Shillong Constituency u Bah Sanbor Shullai ruh u la jngoh ïa kane ka jaka ban jurip hi da lade ïa ka jingjia bad ban ïakynduh ruh ïa ki lanot kiba la duh noh ïa la ki jingdon jingem bad ïa ka ïing ka sem.
Ha ka por mynmiet, u Superintendent of Police ka East Khasi Hills District Bah Vivek Syiem u la leit sha ka jaka ba la jia ka jingpluh ding ban pynlong ïa ka jingtohkit bad leit jngoh ruh ïa ki lanot kiba la pynsah shipor ha ka Them Metor.
