Shillong, Jylliew, 28: Kumba 50 ngut ki briew ki la poi shah sumar ha Tirot Sing Memorial Civil Hospital, Mairang hadien ba ki la kem pang na kaba bamja ha ïing ïap briew kaba ha ka sngi Thohdieng ha ka shnong Nongdom, Eastern West Khasi Hills District.
Ia kine kiba la kem pang la pynkit noh sha Civil Hospital, Mairang ha ka por janmiet sngi Thohdieng sa mynta ka sngi Saitjaiñ.
Ka thymmei khubor ba la iohlum ka la iathuh ruh ba nalor kine ki 50 ngut tam ki dang don ruh kiba la leit shah sumar sha kiwei pat ki Hospital, kata sha Myriaw PHC bad sha Nongstoiñ Civil Hospital, West Khasi Hills District.
Kat haduh ba la thoh ia kane ka khubor ym pat lah ban ioh jingkhein lut haduh katno ngut kiba la kem pang na ka jingleit ing iap briew ha Nongdom.
U Medical Superintendent jong ka Tirot Sing Memorial Civil Hospital, Mairang u la iathuh ba ki nongpang kiba wan thiah pang ki dei kiba ioh ia ka jingpang prie bad pynhiar, khie suh bad la ong ruh ba ka jingpang ka dei na ka jingbam ia ka bam ba la sniew bad don ruh napdeng kiba la kem pang kiba la kham jur ka jingshitom ha kaba la la hap ban ai Oxygen.
U Sordar jong ka shnong Nongdom, u la iathuh ba ki bor Sorkar tang shu ioh jingtip halor kane ka jingjia ki la leit leit mar sha ka iing iap briew ha ka shnong Nongdom ban leh test ia ka um bad shim nuksa ruh ia ka bam khnang ban pynlong ia ka jingleh tes kaba bniah ban lap ia ka daw ka jingkem pang ki nongleit sngewlem ha ing iap briew.
