Shillong, Nailar, 03: Kawei ka shithi ka bym don jingsoi ïa kaba la phah sha ka ophis jong ka Khasi Students Union kaba don ha Jaïaw Chapel Road, Shillong, ka la kdew kti pyrshah da kaba kynnoh ba ka khun kynthei jong u Secretary ka Meghalaya Public Service Commission (MPSC) ka A.Marak ka dei kawei napdeng ki 6 ngut ki nongïakhun ïa ka MCS Preliminary Examination kaba la pyrshah ïa ka jingdawa jong ka KSU ïa ka MPSC ba kan pyni paidbah ïa ki marks jong ki nongïakhun ïa ka eksamin.
Ha ka shithi ba la phah da ka KSU sha ki lad pathai khubor ha ka sngi Saitjaiñ, la pynpaw ba ki nongphah ïa ka shithi ki la kam ruh ba ki dei kiba la pas ïa ka MCS Preliminary Examination bad ba ka kyrteng jong ki ruh ka la mih ha ka Original List jong ki 580 ngut ki Candidate bad ki ong ruh ba kim kwah satia ban pynpaw ïa ka kyrteng jong ki ha ka shithi khnang ban kiar na kino kino ki jingjia.
Ha ka shithi, ba la paw ba ka dei ka la thoh ha ka 2 tarik, Nailar, 2024, la ong, “hadien ba la ïohi ïa ka khubor ba ka Union ka la ïakhun pyrshah ïa ki jingleh bakla jong ka MPSC ha ka eksamin MCS, ngi sngewnguh shikatdei eh ïa ki sienjam kiba phi la shim ha kaba ïadei bad ka jingbym ryntih ha ka jingjied ïa ki MCS ha ka jylla Meghalaya.”
Ka shithi ka kynnoh shuh shuh, “ngi kwah ban pyntip sha phi ba ha ka thup kaba ar kaba la pynmih da ka MPSC hadien ba la lap ïa ka jingbakla kumba la kam da ka MPSC, ka don kawei ka Candidate kaba kyrteng ka A. Marak kaba dei ka khun kynthei jong u Secretary ka MPSC, kaba dei ruh kawei kaba la pynpaw ïa ka jingpyrshah halor ka jingdawa ka seng jong phi ban pynpaw paidbah ïa ki marks ba la ïoh da baroh ki Candidate kiba leit ïakhun ïa ka Prelims Examination kaba la long ha u snem ba ladep.”
Ka shithi ka la kynnoh, “ka (A. Marak) dei kawei napdeng ki 6 ngut kiba la soi ïa ka shithi aplikeshon ban pyrshah ïa ka jingdawa jong ka Union na ka bynta ban pynpaw paidbah ïa ki marks.”
“Ngi kwah ban ïathuh ïa phi ruh ba ka khun jong u Secretary ka la shah jied ha ka post LDA ba la pynlong da ka MPSC ïa kaba la pynbna resol ha u bnai Naitung, kane ka pyni ba ka don ka jingïadei kaba ïajan bha shi iing shi sem ha ka rukom jied jong ka MPSC. Kumta, ngi kyrpad ïa phi ba phin leh ïa kaba donkam ha kaba ïadei bad kane khnang ban pynthikna ba kan don ka jingtreikam kaba khuid bad kaba shai ha ka jingjied ïa ki MCS mynta bad ha ki snem ki ban sa wan, ngi kyrmen ba phin ïai bteng ka jingïakhun bad pynkut noh baroh ïa ki jingïadei shi iing shi sem. Ka jingïakhun jong phi kan ai jingkyrmen biang ïa ngi ki Aspirant ki bym don ka jingïadei bad uno uno ruh uba trei ha MPSC hynrei ngi kwah eh ban long ki nongtrei sorkar ban shakri ïa ka Jylla. Ngi kyrpad ïa phi ban shim ïa kane ka shithi kum ka kam kaba kongsan bha bad ba ka seng jong phi kan sei madan ïa ki jingbym khuid kiba don hapoh ka MPSC,” la bynrap ka shithi.
