Shillong, Naiwieng 01: U Bah Sandondor Ryntathiang bad ki katto katne ngut ki nongialam na Jaintia Hills, na Umsning, Ribhoi District bad na Sohiong, East Khasi Hills District da kawei ka jingmut ki la shim ia ka rai ban mih na ka Hills State People Democratic Party (HSPDP) bad ban pyniasoh bad ka Voice of The People.
Ka ktem jong ka HSPDP Youth Wing ka la pra shwa ba ka Jylla kan leit sha ka elekshon Lok Sabha bad Autonomous District Council (ADC) ki ban long shen ha u snem 2024.
Ia ka shithi iehnohkam, u Bah Sandondor Ryntathiang bad ki 18 ngut ki nongialam la phah sha u President ka HSPDP Central Body ha ka 1 tarik Naiwieng,
Ha ka jingiakren bad ki lad pathai khubor, u Bah Sandondor Ryntathiang uba long u President jong ka Hills State People Democratic Party (HSPDP) Youth Wing Central Body ula kam ba ka jingiehnoh jong kum u President bad mih noh na ka party kam don kano kano ka daw hynrei ka jingmih jong u na ka party ka dei namarba ki bun ki jingeh lada un dang iaineh bad ka party HSPDP.
“Hooid ka nongrim kaba biang, hynrei ngi iohi ban pynskhem bad pynkhlaiñ ia ka nongrim ban leit sha u paidbah ka eh than ia ngi. Kata ka long ha ka jingiohi jong ngi kum ka kynhun lada ngi don ha ka HSPDP,” u la ong.
Haba kylli, u la ong, “hooid, nga don (ka jingthmu ban leit pyniasoh bad kiwei pat ki party), ngam lah ban len ia kata bad ngi ladep shim ruh ia ka rai. Hooid, ka HSPDP ka don ia ka nongrim kaba skhem hynrei haba ngi peit pat ia ki nongialam ka kham tlot shibun eh. Lada ngim lah ban trei ka shu kut noh tang hangta hi. Ka rai kaba ngi la shim ka long ba ngin pyniasnoh bad ka Voice of the People Party (VPP) kaba don ia ka nongrim kaba skhem kum ka HSPDP hi bad ka jingialam hapoh ka VPP hi ka long kaba khlain kumba ngi iohi ha kine ki taiew bad ki bnai, kylleng ka bri u Hynñiewtrep ki paidbah ki la ai ka jingkyrshan ia ka VPP. Ngi ruh ngin nang pynkhlain shuh shuh da kaba leit pyniasnoh.”
U la iathuh ruh ba u la pyniasoh bad ka HSPDP naduh u snem 2019 bad don ruh napdeng ki nongialam kiba la rai ban mih noh na ka HSPDP kiba la pyniasoh mynba u Bah Ardent M. Basaiawmoit u dang long u President ka HSPDP.
“Ka jingbym don shuh jong u Bah Ardent hapoh ka HSPDP ka la pynsah khyllung khynnah tangba ngi dang don ka jingkyrmen ban pynkhlaiñ ka HSPDP. Hynrei U Blei u plie pat ia ka lad ka lynti ban iadon lang bad u Bah Ardent ha kane ka kynti ba mynta bad ngi kyrmen skhem ba ngin nang lah ban ai ia ka jingshakri kaba bha ynda ngi ruh ngi la don lang shata (VPP),” u la ong.
Shuh shuh u la ong, ban pynkhlain ia ka HSPDP hapoh ka jingialam jong u Bah KP Pangniang ka eh than bad dei halor kane ka nongrim ba ma u lem bad ki paralok jong u, ki la rai ban mih noh na ka HSPDP.
Kiwei pat ki nongialam kiba la mih noh na ka HSPDP ki long u Sequacious Pakma, Vice President Youth Wing bad Convenor Jaintia Hills, Helvi Stone Nongbri Vice President Youth Wing, Balumlang Nongbri Vice President Ribhoi bad General Secretary Umsning Circle, Winson Lyngdoh Nonglait, Vice President Umsning Circle, Donbor Marbaniang Organising Secretary Umsning Circle, Shaibanroi Lapang Office Secretary Umsning Circle, Alexius Shadap President Youth Wing Umsning Circle, Ribok Kharpran Vice President Youth Wing Umsning Circle, David Stone Syngkli General Secretary Youth Wing Umsning Circle katba ki dkhot jong ka Umsning Circle ki kynthup ia u Dishon Sun, Aiborlang Synnah, March Born Nongbri, Bah SP Nongbet Adiverser Umsning Circle bad uba long ruh u Hill State Volunteer, Megaland Swer Adviser Sohiong Circle, Janborning Mawlong Adviser Sohiong Circle, Ribanshai Kharbuli General Secretary Sohiong Circle, Shankios Kharbuki Publicity Secretary Sohiong Circle bad Camio Kharbuki dkhot ka Sohiong Circle.
