Shillong, Naitung 01: Ka jingiai ther jong u lapbah lapsan naduh ka sngi u Blei bad bteng haduh ka Lah Sngi U Blei ka la wanrah ia ka jingjot bad ka jingsniew bad pra lut khait jong ka surok kaba pyniasoh naduh Ishyrwat ter ter shaduh ka shnong Umpling, Nongrah, Lapalang, Rynjah bad ia ka surok New Shillong.
Kane ka jingjot jong kane ka surok ka dei na ka daw ka jingtuid jong ka um slap kaba la khoh lut ia ka rong surok bad ia ka khyndew kaba la pynmih ia ki thliew ki syar kat haduh ba ka la pynsuhsat ia ki kali ban iaid lyngba na kane ka surok.
Ka kynhun lum Khubor jong ka Batesi TV kaba la leit jurip ia kane ka surok ka la lap ba ka jingjot jong ka surok ka la pynsyrtok ia ka leit ka wan jong ki kali bad khamtam eh ia ki thuk thuk ar shaka.
Ka kynhun lum khubor ka la lap ruh ia uwei u rangbah uba da la ka mon sngewbha katba u dang wan phai na ka kam bylla u la iarap ban kdew lynti ia ki kali ban kiar na ka thliew kaba la mih hapdeng jong ka surok.
