Shillong, ïaïong, 07: Ar ngut ki briew ki la ïap hashen hadien ba kawei ka kali Alto 800 kaba don ïa u nombar ML05-R 8598 ka la shah syllad haduh ban da pra hi phom na ki bynta ba shakhmat ha kawei ka trok ha ka miet shiteng synnia ka Lah Sngi u Blei ha surok National Highway-6 ha ka shnong Umlyngkdait, Ribhoi District
Ki Pulit jong ka Nongpoh Police Station ki la pyntip ba ki la ïoh jingtip ïa kane ka jingjia na ki nongïaid lynti ha ka por 12:22 baje shiteng synnia jong ka Lah Sngi u Blei.
Marmar ki Pulit ki la leit ban pynlong ïa ka jingtohkit halor kane ka jingjia.
Ha ka jingtohkit, ki Pulit ki la ïoh jingtip ba kane ka jingjia ba sngewsih ka la jia ha ka por kumba 12: 05 baje ha NH-6 Umlyngkdait, Ri-Bhoi District ha kaba ka kali Maruti Alto 800 kaba la niah da u Robi Paswan, 30 snem ka rta na Lumparing, East Khasi Hills, Shillong ryngkat bad uwei u paralok uba la tip kyrteng kum u Prakash, 26 snem ka rta uba sah ha H. No.64/1 PK Building, 8th Main Road Vasanthanagar, Bangalore North, Bangalore, Karnataka.
Ki Pulit ki la ithuh ïa ka kyrteng jong kine ki arngut lyngba ka Driving Licence kaba ki la lap na ki bek thep pisa jong ki. La ong ba kane kali Maruti Alto 800 ka dei kaba mih na Shillong ban hiar sha Guwahati hynrei ynda poi ha ka shnong Umlyngkdait ka la shah syllad ha kawei ka trok bym lah ban tip ïa u nombar plate kaba la phet krad tang hadien kane ka jingjia.
Ka bynta ba shakhmat jong ka kali ka la julor haduh katta katta namarba ka jingshah tynrah ka la long kaba jubor bha kaba la lam shaduh u pud ba u nongñiah bad u paralok kin duh ei syndon ïa la ka jingim.
Hadien ba ladep pyndep ïa ka jingtohkit, ïa ki ar tylli ki metïap la pynkynriah noh da ka Unit Gypsy sha Emergency Room jong ka Civil Hospital Nongpoh bad la buh noh ïa ki metïap ha Civil Nongpoh Morgue Room bad ïa ka kali Maruti Alto 800 la tan noh da ki Pulit sha Nongpoh PS na ka bynta ban leh ïa kaba donkam katkum ki kyndon aiñ.
