Shillong, Nohprah, 15: Ki bor synshar jong ka East Jaiñtia Hills District ha ka sngi Saitjaiñ jong ka taiew baladep ki la pynpra phom ïa ki hynñiew tylli napdeng ki khatwei tylli ki karkhana Coke kiba treikam beaiñ khlem jingbit bad bud ryntih ïa ki kyndon ïada mariang bad ïa ki hukum ka iingbishar.
Ha u kyrwoh ba la phah da ki video ba la pynmih ha ka sngi u Blei, u Deputy Commissioner ka East Jaiñtia Hills District u Shivansh Awasthi u la pyntip ba ka kynhun kaba kynthup ïa ki ophisar bad ki nongtrei jong ka Meghalaya State Pollution Control Board (MSPCB) bad ka tnad Pulit ki la leit ban pynpra noh ïa ki 7 tylli napdeng ki 11 tylli ki karkhana Coke ba khlem ïoh jingbit, ha kaba ki saw tylli kiwei pat la shem ba ladep ban pynpra hi da ki trai karkhana.
Ki don baroh 16 tylli ki karkhana coke ba la ithuh kum ki karkhana kiba treikam beaiñ khlem da ïoh jingbit ha kaba 5 tylli ki dei kiba ladep ban pynpra kham hashwa.
Ki bor synshar District ki la phah jingtip ruh sha ki trai jong ki 11 tylli ki karkhana kiba dang sah naduh u bnai Risaw 2025, ha kaba la hukum ba kin bud ryntih ïa ki kyndon, kata, ban da ïoh jingbit bad ka jingithuh.
“Namar ym shym la ïoh pdiang ïa kano kano ka jubab, kumta ka kynhun ka la ïaid shakhmat ban leit pynpra noh ïa kine ki karkhana ha ka 13 tarik Nohprah 2025,” ong u Awasthi.
