Shillong, Nailar, 23: Ki runar kiba la sop la spaiñ bha ïa la ka jong ka durkhmat ha ka 19 tarik mynta u bnai ki la ïoh rong tuh ïa ki mar remdor na DK Car Automotive, Laitkor, Shillong kynthup ïa ka pisa kaba kot kumba 1 lak tyngka eiei.
Katkum u kyrwoh ba la phah sha ki lad pathai khubor ki bor pynïaid jong ka DK Car Automotive, Laitkor, Shillong ki la ong ba kum kine ki jingjia ki la wanrah ka jingduhnong kaba jur ïa ka kamai kajih bad ha kajuh ka por ki la kyrpad ïa ki paidbah ba kin ym thied satia ïa ki tiar lada don kino kino ki briew kiba die ïa ki tiar tuh khnang ba kan ym pynshlur ïa kino kino ki kam tuh kam thiem.
Ki bor pynïaid ki la kyntu ruh ïa ki paidbah ba kin long kiba husiar bad ban pyntip sha ki bor Pulit la ki lap ne ki ïohi ïa kino kino ki briew kiba don jingisuba sniew haba ki tyrwa ïa ki tiar ha ka dor kaba tad.
Shuh shuh ki bor pynïaid jong ka DK Car Automotive, Laitkor, Shillong ki la kynt ïa ki bor pulit ban pynlong ïa ka jingtohkit kaba bniah bad ban thwet tyngeh ïa ki nonglute kiba donkti bad ban leh da kaba tyngeh katkum ki kyndon jong ka aiñ.
