Shillong, Lber 21: Ka Sorkar Pdeng ka la pyllait ïa ka instalment ba khatduh jong ka scholarship ba kot T. 85. 0779 klur hapoh ka skhim “Umbrella Scheme of Post Matric Scholarship for ST Students for the Academic Session 2024-25” sha ka Jylla Meghalaya.
Ïa kane la pyntip da u Myntri Rangbah ka Jylla Conrad K Sangma haba pyntip ruh ba ka pisa scholarship kan sa phah noh ha ki bank account jong ki samla pule tang ha kine ki 1-2 sngi ban wan.
Halor kane haba thoh ha X, u Myntri Rangbah ula ong, “Nga sngewkmen ban pyntip ba ka Sorkar Pdeng ka la pyllait ïa ka instalment ba khatduh jong ka scholarship ba kot T.85.0779 klur hapoh ka skhim “Umbrella Scheme of Post Matric Scholarship na ka bynta ki samla pule ST na ka bynta ka snem pule Academic Session 2024-25”.
U Myntri Rangbah ula pyntip ba ki don haduh 76,755 ngut ki samla pule kiba aplai ïa ka post matric scholarship ha Jylla.
U ïathuh ba ïa ka instalment ba nyngkong ba kot T. 42.32 klur la pyllait ha ka 24 tarik Jylliew 2024 bad ïa kane ka pisa la sam sha ki 17,364 ngut ki samla pule.
Ïa ka instalment kaba ar ba kot T. 66.67 klur la pyllait ha ka 20 tarik Naiwieng 2024 bad ïa kane ka pisa la sam sha ki 32,064 ngut ki samla pule.
Ïa ka instalment kaba lai bad ba khatduh ba kot T. 85.0779 la pyllait ha ka 21 tarik Lber 2025 bad ïa kane ka pisa yn sa sam sha ki 27, 327 ngut ki samla pule.
U Myntri Rangbah ula pynpaw ba ka Sorkar ka la kut jingmut ban nang pynjanai bad pynsted ïa ka scholarship manla u snem ban pynthikna ïa ka jingkyrshan ba kham kloi ïa ki samla pule ka Jylla na ka bynta ki jingpule jong ki.
