Shillong, Naiwieng 06: Ki Tnat treikam jong ka Khasi Students’ Union (KSU) kiba don ha Sor Shillong bad khap Sor ha ka sngi Palei ki la phah khang noh bad pynsangeh treikam ïa kiba bun ki ophis treikam kiba don ha Sor Shillong namar ka jingbym burom jong ki ïa ka sngi shuti leh niam leh rukom kaba shisien shi snem jong ka Hima Khyrim kaba la ju tip paidbah kum ka shad Nongkrem.
Kane ka jingpynsangeh treikam kaba kyndit ka kynthup ïa ki Bank, ki Post Ophis, ki Ophis jong ki Company ka la sdang naduh ki thaiñ Upper Shillong, Lumdiengjri, Motphran ter ter shaduh ki thaiñ Khyndai Lad, Keating Road, Laitumkhrah, Nongthymmai, Nongmensong bad kiwei kiwei ruh ki Dong ki Shnong.
Ka jingphah jong ka seng ïa ki dkhot ban leit khang ïa kiba bun ki ophis treikam ka long hadien ba kim shym la burom lem wat haba la dep pynbna shuti da ka sorkar ruh.
Kane ka dei ruh ka jingibeinïñ ïa ka jinglong kyrpang jong ka jaitbynriew.
Ka KSU namar kata ka la maham tyngeh ïa baroh ki ophis treikam ba nangne shakhmat haba don ki sngi kyrpang jong ka jaitbynriew kum ka Lyngkhuh sngi ïap U Tirot Sing, Kiang Nangbah, SoSo Tham, Shad Suk Mynsiem, Sengkut Snem, Behdein?khlam ki dei ban kynmaw kyndiang wat nym ap haduh ba ki dkhot ka seng kin wan phah khang, hynrei ki dei ban sngewthuh kaei ka bynta ba ki dei ban leh ban ñiew burom ïa ki sngi kyrpang ka jaitbynriew. Bad Lada ki tnat treikam jong ka Sorkar pdeng lane ki Company kim tip ne ñiew burom ïa ka Sngi kyrpang ka jaitbynriew kam don jingmut ruh ban buh ïa ki Ophis ha kane ka Jaka.
Ha kane ka sngi na ka liang ka seng ka la leit ruh ban khang ophis treikam CM1971 connect, ong ka kyrwoh ba la phah da u Samla Pynshai Rani Information & Publicity Secretary KSU CEC.
