Shillong, Jylliew, 20: Ka War Jaiñtia Students Union ha ka sngi Balang ka la ujor sha u Sub Divisional Officer ka Amlarem Civil Sub-division halor ka jingpynap ki shipai BSF da ka jingker ha surok lad Muktapur-Psadwar.
Ha ka dorkhas ba la soi da u President u samla J. Lajong u la ong, namar ka jingdon ka jingker jong ki shipai BSF ka la pynsyier mynsiem ïa ki paidbah kiba shong basah ha khappud khamtam ïa ki kynthei khynnah kiba ïaid lyngba ïa ka jingker.
“Namarkata, kum ka seng kaba don jingkitkhlieh, ngi kyrpad ïa phi ban shimkhia ïa kane ka mat da kaba ïakren bad ki bor bahalor jong ka tnat shipai BSF khnnag ba ki paidbah kin ïaid lynti da ka jingshngaiñ,” la ong ka seng.
Ka Seng ka la kyntu ruh ïa u SDO ba un tuklar lem halor kane ka jingdawa da kaba phah weng noh ïa ka jingker bad ban dawa ruh ïa ki shipai BSF ba kin sangeh noh mardor ban pyndik ïa ki nongïaid nongieng.
Ha kajuh ka por ka WJSU ka la phah da ka jingthoh sha u Executive Engineer jong ka MePDCL, Jowai ban pynstet noh ïa ka jingpynpur ïa ki waïar elektrik kaba la pynsahteng da ka ophis naduh Lad Darrang shaduh Dawki PHC lyngba surokbah National Highway.
Ka seng ka la pyntip ruh ba ka Jio Company ba la long trai da u Mukesh Ambani ka la pynieng ïa ki nar post elektrik ha shilynter ka surok naduh Lad Darrang shaduh Dawki PHC.
