Shillong, Lber, 27: Ki shipai BSF kiba la ïoh jingtip kaba bniah na ki tnat syntiat ha ka sngi Balang ha ka jingpynap shrip bad ka ophis Custome ha Lad Bakli, (Sohrit Cham) ki la ïoh kurup bun bah ki mar khaii be-aiñ kiba shongdor T.21, 74,400 lak ha East Khasi Hills District.
Ha ka jingtalasi, ki shipai BSF bad ki nongtrei ka ophis Custom ki la ïoh pynsangeh ïa kawei ka Bos kaba wan na Shillong ban leit sha Photkroh, ha kaba la lap ba la thep ïa ki mar ba isuba sniew.
Namarba ym don satia mano mano ruh ban kam trai bad namar ka jingbym don ïa ki kot ki sla kiba biang, ïa kine ki mar la kurup noh mardor bad la aiti sha ka ophis Custom ha Dangar ban pynlong ïa ka jingtohkit katkum ki kyndon aiñ.
Ha kawei pat ka jingpynap shrip lyngba ka jingïoh jingtip na ki tnat syntiat, ki shipai BSF Meghalaya ki la ïoh pyllait im 47 tylli ki masi na khappud ka South West Khasi Hills, South Garo Hills bad East Khasi Hills ha ka step sngi Balang.
Ïa kine ki masi ba la thmu ban shalan tuh sha ka ri Bangladesh la aiti noh sha ki Pulit.
Ki shipai BSF Meghalaya ki la peitngor bha ha shilynter ka khappud namar ka jingdon jong ka lehniam Eid-ul-Fitr kumta ka jingdawa ïa ki masi ha ka ri Bangladesh ka jur bha ha kine ki sngi.
