Shillong, Nailur, 03: Ka All Meghalaya Tourist Taxi Association (AMTTA) ha ka sngi Balang ka la pynbna ïa ka rai ban khang naduh ka 16 tarik mynta u bnai ïa ki kali kamai Tourist kiba wan nabar ka jylla ban rung sha ki jaka jngohkai pyrthei kiba don ha kylleng ki bynta jong ka jylla Meghalaya.
Ha ka jingïakren bad ki lad pathai khubor u President ka Seng u Bah Ricaldinus Dohling u la pynshai ba kane ka rai kan treikam tang ïa ki nongñiah kali tourist kiba wan nabar ka jylla hynrei kan ym ktah satia ïa ki nongjngohkai namarba ka seng kan sa pynbiang ïa ki kali na ka bynta ki nongjngohkai kiba thmu ban leit kai pynngad sha ki bynta bapher bapher ka jylla Meghalaya.
U la ong ba kane ka jingshim rai jong ka seng ka long namar ka jingbym leh eiei jong ka Sorkar Meghalaya wat hapdeng ki jingïakren bad u Myntri Rangbah ka Jylla u Conrad K. Sangma namarba ka la pynduh kamai haduh katta katta ïa ki nongñiah kali kamai Tourist trai jylla na ka jylla.
U la ong ruh lada ka Sorkar ka khot ban ïakren pynbeit halor kane ka jingdawa ka seng ka long kaba kloi ban leit sha ka miej jingïakren shwa ban treikam ka jingpynbna.
